اسلام آباد (نیوز ڈیسک)راولپنڈی: حنا جاوید قتل کیس میں ڈی این اے رپورٹ کی سمری سامنے آنے کے بعد تفتیش نے نیا رخ اختیار کرلیا ہے۔
پولیس ذرائع کے مطابق مقتولہ کے جسم سے حاصل کیے گئے مردانہ تولیدی خلیوں کے نمونے گرفتار ملزم ذیشان ارشد کے ڈی این اے سے مطابقت رکھتے ہیں۔
ایکسپریس نیوز کی رپورٹ کے مطابق پولیس ذرائع نے خدشہ ظاہر کیا ہے کہ حنا جاوید کو قتل کرنے کے بعد مبینہ طور پر جنسی زیادتی کا نشانہ بنایا گیا۔ تاہم، ان شواہد کی روشنی میں واقعے کی مکمل نوعیت اور قتل میں ملوث شخص کے تعین کے لیے تفتیش جاری ہے۔
رپورٹ کے مطابق مقدمے میں نامزد تینوں افراد، جن میں مقتولہ کے شوہر فیصل اصفر، گھریلو ملازم ذیشان ارشد اور سسر فیصل اصغر شامل ہیں، کے ڈی این اے نمونے حاصل کرکے ان کا تجزیہ کیا گیا۔
مختلف مقامات سے اہم شواہد مل گئے
پولیس ذرائع کے مطابق ڈی این اے تجزیے میں مقتولہ کے شوہر کا نمونہ چار مقامات پر میچ ہوا، جبکہ حنا جاوید کے ناخنوں سے حاصل کیے گئے نمونوں میں گھریلو ملازم ذیشان ارشد کا ڈی این اے بھی پایا گیا۔
مزید برآں، قتل کے دوران استعمال ہونے والی مبینہ چادر سے فیصل اصغر کے فنگر پرنٹس ملنے کا دعویٰ کیا گیا ہے۔ رپورٹ میں یہ بھی بتایا گیا ہے کہ مقتولہ کے جسم پر ذیشان ارشد کے فنگر پرنٹس کی مطابقت سامنے آئی ہے۔
قتل میں ملوث شخص کا تعین تاحال نہیں ہوسکا
ڈی این اے رپورٹ میں متعدد اہم شواہد سامنے آنے کے باوجود پولیس تاحال یہ حتمی طور پر معلوم نہیں کرسکی کہ حنا جاوید کو قتل کس نے کیا۔ تفتیشی حکام مختلف شواہد اور ملزمان کے کردار کا جائزہ لے رہے ہیں تاکہ واقعے کی اصل حقیقت سامنے لائی جاسکے۔
واضح رہے کہ ڈی این اے یا فنگر پرنٹس کا کسی مقام پر ملنا بذاتِ خود قتل میں ملوث ہونے کا حتمی ثبوت نہیں ہوتا۔ کیس میں ہر ملزم کے کردار اور شواہد کی قانونی حیثیت کا تعین تفتیش اور عدالتی کارروائی کے ذریعے کیا جائے گا۔
