اسلام آباد (آن لائن) سپریم کورٹ نے نیب قانون کے خلاف عمران خان کی ترمیم شدہ درخواست ابتدائی سماعت کیلئے منظور کر لی ہے۔ معاملہ کی سماعت چیف جسٹس کی سربراہی میں تین رکنی بینچ نے کی۔ دوران سماعت عمران خان کے وکیل خواجہ حارث نے دلائل دیئے کہ نیب قانون میں حالیہ کی گئی ترامیم میں آمدن سے زائد اثاثوں کا جرم ثابت کرنا ناممکن بنا دیا گیا ہے۔

پہلے آمدن سے زائد اثاثوں پر وضاحت نہ دے پانے پر کارروائی ہوتی تھی،ترمیم کے بعد کرپشن کے پیسے سے اثاثے ثابت کرنے پر ہی کارروائی ہوسکے گی،آمدن یا اثاثے ظاہر نہ کرنا نیب کا جرم نہیں بنتا،ظاہر نہ کردہ آمدن کا غیر قانونی ہونا لازمی نہیں، سپریم کورٹ نے کرونا ازخودنوٹس میں وفاقی و صوبائی حکومتوں کو قانون سازی کا حکم دیا،ہم نے اپنی تحریری معروضات جمع کرا دی ہیں، عدالت کے سامنے وہ ترامیم رکھنا چاہوں گا جو بادی النظر میں آئین سے متصادم ہیں،آئندہ سماعت پر باضابطہ دلائل شروع کروں گا۔وفاقی حکومت کے وکیل مخدوم عملی خان نے نے عدالت کو بتایا کہ ترمیم شدہ درخواست پر تفصیلی جواب جمع کراوں گا،میں نے ترمیم شدہ پٹیشن جمع کروائی ہے،بہتر ہوگا کہ انہیں نوٹس کر دیں تاکہ اس کا جواب بھی آجائے،چیف جسٹس آف پاکستان نے ریمارکس دیئے کہ یہ حقیقت ہے کہ لوگ ٹیکس گوشواروں میں مکمل اثاثے اور آمدن ظاہر نہیں کرتے،وفاقی حکومت کے وکیل چاہیں تو درخواست کے قابل اعتراض ہونے کا نکتہ اٹھا سکتے ہیں۔ جسٹس منصور علی شاہ نے ریمارکس دیئے کہ پالیسی سازی کے اصولوں کیخلاف ہونے پر کوئی قانون کالعدم نہیں ہوسکتا،پالیسی اصولوں کے مطابق قمار بازی اور منشیات کیخلاف قانون ہونا چاہیے،اگر قمار بازی کیخلاف قانون نہ ہو تو عدالت کیا حکم دے سکتی ہے؟عدالت عظمٰی نے اس موقع پرعمران خان کے وکیل کی ترمیم شدہ درخواست سماعت کیلئے منظور کرتے ہوئیکیس کی سماعت 26 ستمبر سے شروع ہونے والے ہفتے تک کے لیے ملتوی کر دی ہے۔