کراچی ، اسلام آباد(مانیٹرنگ  ڈیسک، اے پی پی) عالمی منڈی میں خام تیل کی قیمتوں میں کمی واقع ہوئی ہے۔ رپورٹس کے مطابق منگل کو کاروبار کے دوران برینٹ کروڈ آئل کی قیمت میں 7 ڈالر تک کمی ہوئی جس کے بعد اس کی فی بیرل قیمت 97.97 ڈالر ہوگئی۔

اس کے علاوہ امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کی قیمت 6.10 ڈالر فی بیرل کمی کے بعد 90.93 ڈالر ہوگئی ہے۔دوسری جانب بین الاقوامی مالیاتی فنڈ (آئی ایم ایف) نے کہا ہے کہ کوئلہ کی بجائے متبادل ذرائع سے توانائی کا حصول معاشی اور سماجی طور پر بہت زیادہ سودمند ہے۔ اپنی ایک رپورٹ میں آئی ایم ایف نے کہا ہے کہ کوئلہ کی جگہ پر متبادل ذرائع سے توانائی حاصل کرکے رواں صدی کے اختتام تک 78 کھرب ڈالر کا فائدہ حاصل کیا جا سکتا ہے جو عالمی مجموعی قومی پیداوار کے 1.2 فیصد کے مساوی ہو گا۔ سماجی حوالہ سے متبادل ذرائع سے توانائی کے حصول کے بارے میں آئی ایم ایف نے کہا ہے کہ اس سے موسمیاتی تبدیلیوں کے نقصانات کو کم کرنے کے ساتھ ساتھ انسانی صحت کی مشکلات میں بھی کمی لائی جا سکتی ہے۔

موضوعات:تیل قیمتیں