ریاض: سعودی عرب کے وزیر تجارت ماجد القصبی نے تجارتی ضوابط کی خلاف ورزی کرنے والے کاروباری اداروں اور دکانداروں کے لیے جرمانوں کے نئے شیڈول کی منظوری دے دی ہے، جس کے تحت بعض خلاف ورزیوں پر ایک لاکھ سعودی ریال تک جرمانہ عائد کیا جاسکے گا۔

سعودی خبر رساں ادارے کے مطابق وزارت تجارت نے صارفین کے حقوق کے تحفظ اور تجارتی سرگرمیوں کو قواعد و ضوابط کے مطابق چلانے کے لیے مختلف خلاف ورزیوں پر مالی سزائیں مقرر کی ہیں۔ ان میں اشیائے ضروریہ کے لیے طے شدہ نرخوں کی خلاف ورزی بھی شامل ہے، جس پر ایک لاکھ ریال تک جرمانہ ہوسکتا ہے۔

سامان کی واپسی اور تبدیلی سے متعلق قواعد

نئے ضوابط کے مطابق دکان یا تجارتی مرکز پر ایسا نوٹس آویزاں کرنا جس میں درج ہو کہ فروخت شدہ سامان واپس یا تبدیل نہیں کیا جائے گا، قابلِ جرمانہ خلاف ورزی ہے۔ اس عمل پر ایک ہزار سعودی ریال تک جرمانہ عائد کیا جاسکتا ہے۔

الیکٹرانک ادائیگی سے انکار پر بھی کارروائی

وزارت تجارت کی جانب سے منظور کردہ شیڈول میں الیکٹرانک ادائیگی کے نظام سے متعلق خلاف ورزیوں کے لیے بھی جرمانے مقرر کیے گئے ہیں۔ ان خلاف ورزیوں پر 200 سے ایک ہزار ریال تک جرمانہ ہوسکتا ہے۔

اسی طرح ادائیگی کے ذرائع دستیاب ہونے کے باوجود انہیں قبول کرنے سے انکار کرنے پر 400 سے 2 ہزار ریال تک جرمانہ عائد کیا جاسکتا ہے۔ اگر کوئی دکاندار یا تجارتی ادارہ اسی نوعیت کی خلاف ورزی دوبارہ کرے تو جرمانے کی رقم دگنی ہوسکتی ہے۔

رسید اور قیمت درج نہ کرنے پر بھی جرمانہ

مقررہ قواعد کے تحت خریدار کو فروخت کی رسید جاری نہ کرنا اور مصنوعات پر قیمت واضح طور پر درج نہ کرنا بھی خلاف ورزیوں میں شامل ہے۔ تجارتی اداروں کے لیے ان ضوابط پر عمل کرنا ضروری ہوگا۔

اس کے علاوہ رعایتی فروخت، سیل اور تجارتی مقابلوں کے انعقاد کے لیے مقرر کردہ شرائط کی خلاف ورزی اور مصنوعات کے بارے میں صارفین کو غلط معلومات فراہم کرنے پر بھی کارروائی کی جاسکتی ہے۔ ان خلاف ورزیوں کے لیے 200 سے ایک ہزار سعودی ریال تک جرمانہ مقرر کیا گیا ہے۔

سعودی وزارت تجارت کے منظور کردہ شیڈول میں مختلف تجارتی سرگرمیوں سے متعلق متعدد خلاف ورزیاں شامل ہیں۔ ان اقدامات کا مقصد کاروباری معاملات میں قواعد کی پابندی یقینی بنانا اور صارفین کے حقوق کا تحفظ کرنا ہے۔