جڑانوالہ(آن لائن)حقیقی چچاؤں نے اڑھائی ماہ کانومولود بھتیجا اغواکے بعد2لاکھ روپے میں فروخت کردیاجبکہ پولیس نے جدید تکنیکی ذرائع استعمال کرتے ہوئے بچہ برآمد کرکے ملزمان کو گرفتاراور ان کے خلاف مقدمہ درج کرکے قانونی کارروائی شروع کردی ہے۔

تفصیلات کے مطابق پولیس تھانہ چک جھمرہ کے علاقہ115 ج ب دیال گڑھ میں 2حقیقی چچاؤں مظہرمسیح اور شمشاد مسیح نے اپنے بھائی اظہر مسیح کے اڑھائی ماہ کے نومولود بیٹے کواغواکے بعد2 لاکھ روپے میں سیالکوٹ کی رہائشی خاتون کو فروخت کردیا۔چک جھمرہ پولیس نے مغوی بچے کے والد اظہر مسیح کی مدعیت میں مقدمہ درج کرکے مغوی بچے کو 36گھنٹے بعد بازیاب کروا کے ملزمان کو گرفتار کر لیا۔ پولیس نے جدید ٹیکنیکل ذرائع بروئے کار لاتے ہو ئے ملزمان مظہر اور شمشادمسیح کو صفدرآباد سے گرفتار کرکے ان کی نشاندہی پر بچہ برآمد کیا تاہم خاتون کی گرفتاری کیلئے کوششیں جاری ہیں۔سی پی او فیصل آباد عمر سعید ملک نے واقعہ کا نوٹس لے کر بچے کی بازیابی اور ملزمان کی گرفتار کے احکامات جاری کئے تھے جس پر ایس پی مدینہ ٹاؤن نبیل کھوکھر نے ایس ایچ او تھانہ چک جھمرہ سب انسپکٹر میاں واجد کے ہمراہ فوری کارروائی کرکے مغوی بچے کو بازیاب کروا کر اکے والدین کے حوالے کردیا