لاہور(مانیٹرنگ ڈیسک /این این آئی)عمران خان نے پنجاب کابینہ میں شمولیت کے خواہشمند ارکان کے لیے سخت شرائط رکھ دیں۔سابق وزیراعظم نے ہدایات جاری کیں ہیں کہ کابینہ حصہ بننے والا کوئی رکن چھٹی نہیں کرے گا ‘ صوبائی وزراء کو 14 گھنٹے ڈیوٹی کرنا ہوگی۔ تفصیلات کے مطابق چیئرمین پی ٹی آئی عمران خان سے لاہو ر،گوجرانوالہ، سرگودھا، راولپنڈی، ملتان اور بہاولپور ڈویژن کے ارکان اسمبلی نے ملاقاتیں کیں –

ملاقات کرنے والوں میں خواتین اور اقلیتی ایم پی ایز بھی شامل تھے-عمران خان نے الیکشن میں عمدہ کارکردگی پر ارکان اسمبلی کی کاوشوں کو سراہا،چیئرمین پی ٹی آئی عمران خان نے مختلف ڈویژن کے ارکان اسمبلی سے گفتگو کرتے ہو ئے کہاکہ ملک میں استحکام صاف وشفاف الیکشن سے ہی ممکن ہے-مالیاتی اداروں کا حکومت پر اعتماد ختم ہوچکا ہے، مستحکم جمہوری حکومت آنے تک معاشی بحران نہیں جائے گا- حالات مزید مشکل ہوسکتے ہیں،ہر چیز مزید مہنگی ہونے والی ہے- کرپٹ حکمران آتے ہیں تو ملک نیچے جاتے ہیں -انہوں نے مزید کہاکہ حقیقی سیاست عبادت کے مترادف ہے-یہاں لوگ سیاست میں پیسہ بنانے آتے ہیں،لیکن اب عوامی شعور بیدار ہوچکا ہے- بچوں میں ملکی مسائل کے شعور کی بیداری خوش آئند ہے-قوم کی توقعات اب پی ٹی آئی سے وابستہ ہیں -عمران خان نے کہا کہ اپوزیشن ابھی تک پے درپے شکست کے صدموں سے باہر نہیں آسکی۔ عمران خان نے مزید کہا کہ پنجاب میں مربوط تنظیم سازی پر توجہ دی جائے-ممبرشپ کیلئے وقت موزوں ہے،جنرل الیکشن کو مدنظر رکھ کر تنظیم سازی کی جائے-ملاقات میں ارکان اسمبلی سے خطاب کرتے ہوئے مخدوم شاہ محمود قریشی نے کہاکہ نظریے اور اصول کی سیاست کرنے والے ارکان اور کارکن عزت و تکریم کے مستحق ہیں -جنوبی پنجاب کو نظر انداز کرنے والوں کا وقت گزرچکا ہے-

جنوبی پنجاب پی ٹی آئی کا گڑھ تھا،ہے اور رہے گا-سابق وزیر راجہ بشارت نے کہاکہ تنظیم سازی میں ارکان اسمبلی سے مشاورت یقینی بنائی جائے- یاور بخاری نے کہاکہ دباؤ کے باوجود کارکنوں کا عزم اور حوصلہ قابل تحسین ہے۔ سابق وزیر ہاشم جواں بخت نے کہا کہ مختص فنڈ اب جنوبی پنجاب میں ہی خرچ ہوں گے-

ڈاکٹر یاسمین راشد نے کہاکہ لاہور نے ضمنی الیکشن میں ثابت کردیا کہ لاہور اب پی ٹی آئی کا ہے۔میاں اسلم اقبال نے کہاکہ لاہور کے زیرتکمیل پراجیکٹس کو جلد مکمل کیا جائے۔ ڈاکٹر مراد راس نے کہاکہ عمران خان کی قیادت میں سیاسی جدوجہد جاری رہے گی۔

ارکان پنجاب اسمبلی نے اجلاس میں اپنے حلقوں کی ترقی اورعوامی مسا ئل کے حل سے متعلق تجاویز اور سفارشات پیش کیں – اجلاس میں ترقیاتی منصوبوں پر تبادلہ خیال بھی کیا گیا۔سپیکر سبطین خان، ڈپٹی سپیکر واثق قیوم اور نو منتخب ایم پی اے خاتون سائرہ رضا کو مبارکباد بھی دی گئی-

سابق وفاقی وزراء، مخدوم شاہ محمود حسین قریشی، شفقت محمود، عامر کیانی،سپیکر پنجاب اسمبلی سبطین خان، ڈپٹی سپیکر واثق قیوم،چیف وہپ عباس علی شاہ،شہباز گل،حافظ فرحت عباس اور دیگر بھی شریک تھے-