لاہور(این این آئی)سابق وفاقی وزیر اطلاعات ونشریات اور تحریک انصاف کے مرکزی رہنما فواد چوہدری کو پنجاب کا وزیرداخلہ بنائے جانے پر غور کیا جارہا ہے۔ذرائع کے مطابق چیئرمین تحریک انصاف اور سابق وزیراعظم عمران خان نے دورہ لاہور کے دوران
وزیراعلی ہاؤس میں وزیراعلی چوہدری پرویزالٰہی اور ان کے صاحبزادے چوہدری مونس الٰہی سے ملاقات کی جس میں صوبائی حکومت کے امور، عوامی فلاح و بہبود کے منصوبوں اورپنجاب کابینہ کے ناموں پر مشاورت کی گئی۔ذرائع کا کہنا ہے کہ سابق وزیراعلی پنجاب عثمان بزدار کی کابینہ میں شامل بہتر کارکردگی دکھانے والے وزرا ء ایک بار پھر کابینہ کا حصہ ہوں گے جبکہ چند مزید افراد کو بھی کابینہ میں شامل کیے جانے کا امکان ہے۔ذرائع کے مطابق میاں محمودالرشید سینئر وزیر، ڈاکٹر مراد راس کو تعلیم، ڈاکٹر یاسمین راشد کو وزیرصحت، راجہ بشارت کو وزیرقانون،ہاشم جواں بخت کو وزیر خزانہ،راجہ یاسر ہمایوں کو وزیر ہائر ایجوکیشن، انفارمیشن ٹیکنالوجی اور ٹورازم بنائے جانے کا امکان ہے۔ذرائع کا کہنا ہے کہ پنجاب کے وزیرداخلہ کیلئے فوادچوہدری اور عمرسرفرازچیمہ کے نام زیر غور ہیں جبکہ میاں اسلم اقبال کو کامرس اینڈ انڈسٹریز کا قلمدان دیا جائے گا۔محسن لغاری، فیاض الحسن چوہان، صمصام بخاری بھی کابینہ کا حصہ ہوں گے، جبکہ کابینہ کیلئے (ق) لیگ کے ارکان اسمبلی کے ناموں پر بھی مشاورت جاری ہے۔
