سیاسی جماعتوں اور اسٹیبلشمنٹ کے تعلقات میں وقت کے ساتھ بہت بہتری آئی ہے، آصف زرداری
کراچی (این این آئی) سابق صدر اور پاکستان پیپلز پارٹی پارلیمنٹرینز کے صدر آصف علی زرداری سے ہفتہ کو کراچی میں
صوبائی وزرا نے بلاول ہائوس میں ملاقات کی ہے۔ صحافیوں سے گفتگو کرتے ہوئے آصف علی زرداری نے کہا کہ کاش
عمران خان کو صحافیوں کے حقوق کا خیال اپنے دور حکومت میں بھی آجاتا۔ پیپلز پارٹی کے دور حکومت میں ہمیشہ صحافیوں
کو آزادی ملی ہے اور ملتی رہے گی۔انہوں نے کہا کہ عمران خان کا دور آزادی صحافت کے لحاظ سے سیاہ دور رہا ہے۔
سیاسی جماعتوں اور اسٹبلیشمنٹ کے تعلقات میں وقت کے ساتھ بہت بہتری آئی ہے اور وقت کے ساتھ اور بہتری آئے گی ،
کیونکہ سب کا مقصد ملک کی ترقی اور جمہوریت کی مضبوطی ہے۔ آصف زرداری نے کہا کہ ہم سب نے وقت سے بہت کچھ سیکھا ہے۔
اس ملک کو اتحادی حکومت ، اسٹبلیشمنٹ اور عدلیہ ، سب نے ملکر اور آئین کی پاسداری کرتے ہوئے اس بحران سے نکالنا ہے جس میں عمران خان ہمیں چھوڑ کر گیا ہے۔
