سری لنکن وزیراعظم کے بعد صدر کا بھی مستعفی ہونے کا فیصلہ
کولمبو (مانیٹرنگ، این این آئی)سری لنکا کے وزیراعظم کے بعد صدر بھی مستعفی ہونے کے لئے تیار ہو گئے ہیں،
نجی ٹی وی کے مطابق فرانسیسی خبر رساں ادارے کا کہنا ہے کہ سینئر سری لنکا سرکاری اہلکار نے بتایا ہے کہ
صدر گوٹابایا راجاپاکسے تیرہ جولائی کو اپنے عہدے سے استعفی دے دیں گے، واضح رہے کہ سری لنکا میں بد ترین معاشی بحران
کے پیش نظر وزیراعظم وکرما سنگھے کْل جماعتی حکومت بنانے کے لیے استعفیٰ دینے کو تیار ہوگئے ہیں۔سری لنکن پی ایم آفس اعلامیے
کے مطابق وزیراعظم وکرما سنگھے ملک کے معاشی بحران کے حل کے لیے کْل جماعتی حکومت بنانے کے لیے مستعفی ہونے پر راضی ہوگئے ہیں۔
میڈیا رپورٹ کے مطابق سری لنکا میں ہزاروں مظاہرین نے صدارتی محل پر دھاوا بولا اور مطالبہ کیا تھا کہ صدر گوٹابایا راجاپاکسے استعفیٰ دیں۔
میڈیا رپورٹ کے مطابق صدارتی محل پر مظاہرین کے حملے سے پہلے ہی صدر کو بحفاظت نکال لیا گیا تھا۔
سیکیورٹی فورسز نے مظاہرین سے نمٹنے کے لیے فائرنگ کی، جس سے 3 افراد زخمی ہوئے جبکہ آنسو گیس کی شیلنگ سے 30 سے زائد متاثر ہوئے ہیں۔
