اسلام آباد (این این آئی)اتحادیوں کے بڑھتے خدشات پر وزیراعظم شہباز شریف اور آصف زرداری کے ملاقات ہوئی۔وزیراعظم ہاؤس میں ہونے والی ملاقات میں موجودہ سیاسی صورتحال پر گفتگو کی گئی جس میں وزیر خارجہ بلاول بھٹو، سردار ایاز صادق، سعد رفیق بھی شریک ہوئے۔
ایم کیو ایم نے پیپلز پارٹی سے معاہدے پر عمل درآمد نہ ہونے پر شہباز شریف سے مداخلت کی درخواست کی تھی۔ملاقات میں ملک کی مجموعی سیاسی صورتحال و ایم کیو ایم کے تحفظات پر مشاورت کی گئی، وزیراعظم شہباز شریف نے تمام اتحادیوں کے تحفظات دور کرنے کی یقین دہانی کرائی۔وزیراعظم نے آصف زرداری سے ایم کیو ایم کے تحفظات پر مشاورت کی اور درخواست کی کہ ایم کیو ایم کے ساتھ تحریری معاہدے پر عملدرآمد کیا جائے۔علاوہ ازیں وزیراعظم شہباز شریف سے بلوچستان عوامی پارٹی (بی اے پی) کے پارلیمانی لیڈر خالد مگسی نے بھی ملاقات کی۔ملاقات میں وزیراعظم نے بی اے پی کے تحفظات سنے اور جلد مسائل حل کرنے کی یقین دہانی کرائی جبکہ وزیراعظم سے وفاقی وزیر سالک چوہدری نے بھی ملاقات کی اور شہباز شریف کو سرمایہ کاری سے متعلق آگاہ کیا۔وزیراعظم نے بلوچستان سے آزاد رکن اسمبلی اسلم بھوتانی نے علیحدہ ملاقات کی جس میں وفاقی وزیر منصوبہ بندی و ترقی احسن اقبال بھی موجود تھے۔ وزیراعظم شہباز شریف نے اسلم بھوتانی کے تحفظات سنے اور انہیں دور کرنے کی یقین دہانی کرائی۔
