لاہور (آن لائن ، این این آئی) وفاقی وزیر شاہ زین بگٹی کے بھائی گہرام بگٹی ان کی دو بیگمات اور صاحبزادہ بھی نیب بلوچستان کے ریڈار پر آگئے ہیں۔ جس کے نتیجے میں نیب بلوچستان نے رکن اسمبلی گہرام بگٹی اور ان کی دوبیگمات سمیت صاحبزادے کے خلاف انکوائری شروع کردی ہے۔
یہ بھی بتایا گیا ہے کہ نیب بلوچستان نے لاہور سمیت پنجاب کے مختلف اضلاع کے کمشنروں اور محکمہ ریونیو پنجاب کو باقاعدہ مراسلے ارسال کردئیے ہیں جن میں مذکورہ محکمہ جات سے گہرام بگٹی اور ان کی فیملی کے نام رہائشی اور کمرشل جائیدادوں کی تفصیلات طلب کرلی گئی ہیں۔دوسری جانب سابق چیئرمین واپڈا لیفٹیننٹ جنرل (ر)مزمل حسین نے کہاہے کہ مجھ پر لگنے والے الزامات غلط ہیں،میری طرف سے معاملہ کلیئر ہے، نیب جب بلائے گا تو دوبارہ آ جائوں گا۔سابق چیئرمین واپڈا نے نیب آفس کے باہر میڈیا سے گفتگو کرتے ہوئے کہاکہ پراجیکٹ کی لاگت 750 ملین روپے ہے تو 753 ملین کی کرپشن کیسے ہو گئی؟ ٹھیکیداروں کو وقت سے پہلے ادائیگیاں نہیں کی گئیں۔سابق چیئرمین واپڈا نے کہا کہ تربیلا 4 توسیعی منصوبہ مدت سے پہلے مکمل ہوا، 1 سال میں اس کی لاگت بھی پوری کر لی، میں نہیں سمجھتا کہ اس کیس کے پیچھے سیاسی محرکات ہیں۔انہوں نے مزید کہا کہ میرے خلاف شکایت آئی تھی کہ نیب نے ویریفکیشن کرنا ضروری سمجھا ہے، نیب نے جو پوچھا بتا دیا، مجھے کوئی سوالنامہ نہیں دیا گیا۔لیفٹیننٹ جنرل ریٹائرڈ مزمل حسین کا یہ بھی کہنا ہے کہ میری طرف سے معاملہ کلیئر ہے، نیب جب بلائے گا تو دوبارہ آ جائوں گا۔
