کراچی (این این آئی)پاکستان میں تین نسلوں کی جانب سے عالمی ریکارڈ قائم کرنے کا ریکارڈ بن گیا،باپ اور بیٹی کے بعد دادا کے عالمی ریکارڈ کو تسلیم کرلیا گیا، معمر ترین 70 سالہ نسیم الدین کو گنیز ورلڈ ریکارڈ کی طرف سے 2 سرٹیفکیٹ موصول ہو گئے،گنیز ورلڈ ریکارڈ

نے ویڈیو اپنے آفیشل پیج پر بھی اپلوڈ کر دی جس کو اب تک ایک کروڑ افراد دیکھ چکے۔پیشہ کے لحاظ سے ویلڈر کراچی کے رہائشی 70 سالہ نسیم الدین نے ایک ہاتھ سے مٹھی میں سیب توڑنے کے مقابلے میں انگلینڈ کو شکست دی تھی ، انہوں نے13 کے مقابلے میں 18 سیب توڑنے کے بعد اپنے ریکارڈ کو 21 مرتبہ مٹھی میں سیب توڑ کر مزید بہتر کیا تھا،گنیز ورلڈ ریکارڈ نے ریکارڈ کو منظور اور تصدیقی ایمیل بھی جاری کی، جبکہ گنیز ریکارڈ کی تفصیلات ویب سائٹ پر بھی موجود ہیں۔گینز ورلڈ ریکارڈ کی سالگرہ کے موقع پر نسیم الدین نے نئی تاریخ رقم کی، نسیم الدین کا سرٹیفکیٹ موصول کرنے کے بعد کہنا ہے کہ ساری زندگی لوہے کے ساتھ کام کیا ہے، اس لیے ہاتھ بھی لوہے کا ہی ہو گیا ہے، خواہش تھی کہ میں پاکستان کا نام روشن کروں، اب جب سرٹیفکیٹ بھی مل گئے ہیں تو خوشی دوبالا ہوگئی ہے۔نسیم الدین پاکستان کے لیے مارشل آرٹس میں پوری دنیا میں سب زیادہ 77 عالمی ریکارڈز بنانے والے محمد راشد کے والد ہیں جب کہ ان کی پوتی فاطمہ بھی صرف 7 سال کی عمر میں ورلڈ ریکارڈ بنا چکی ہیں،دریں اثنانسیم الدین نے یہ ریکارڈ پاکستان کرکٹ ٹیم کے نام کردیا۔

موضوعات:عالمی ریکارڈ