گوجرانوالہ ،کراچی(مانیٹرنگ ڈیسک ،این این آئی)گوجرنوالہ میں بینک کیش وین کا ڈرائیور ساڑھے سولہ کروڑ کی رقم لیکر فرار ، نجی ٹی وی نیو نیوز کے مطابق بینکوں سے پیسوں کی منتقلی کے دوران گارڈزرقم لینے گئے تو واپسی پر ڈرائیورکیش وین سمیت فرار ہوگیا، وین کا سی سی ٹی وی فوٹیج کے ذریعے پیچھا کیا گیا تو وین نواب چوک کے قریب سے ملی۔
وین سے ساڑھے سولہ کروڑ کی رقم غائب تھی ،پولیس کے مطابق جس کمپنی کے گارڈز ہیں ان سے بھی رابطہ کیا جارہا ہے جلد ملزم گرفتار کرلیں گے ،دوسری جانب شہر قائد کے علاقے سچل میں نجی کمپنی کی کیش وین لوٹنے والے ڈاکو پولیس کی فائرنگ سے شدید زخمی ہو گئے، واقعے کی فوٹیج بھی سامنے آ گئی ہے۔تفصیلات کے مطابق سچل میں پولیس مقابلے میں 3 ڈاکو زخمی ہو گئے تھے،معلوم ہوا ہے کہ ملزمان نجی کمپنی کی کیش وین کو لوٹنے کی کوشش کر رہے تھے، کیش وین کے اندر لگے سی سی ٹی وی کیمرے کی فوٹیج میں ہتھوڑے کی مدد سے لاک توڑتے ملزم کو دیکھا جا سکتا ہے۔ڈاکوئوں نے وین کے اندر کیش کائونٹر کو ایک بڑے ہتھوڑے کے ذریعے توڑا، اس وقت کیش وین میں 4 لاکھ سے زائد رقم موجود تھی، تاہم موقع پر پولیس پہنچ گئی، جس کے بعد پولیس اہل کاروں اور ڈاکوئوں کے درمیان فائرنگ کا تبادلہ ہوا۔پولیس اہل کاروں نے مہارت کے ساتھ تینوں ڈاکوئوں کو ٹانگوں میں گولیاں مار کر زخمی اور بے بس کیا، بعد ازاں پولیس نے انھیں حراست میں لے کر طبی امداد کے لیے اسپتال منتقل کر دیا۔واقعے سے متعلق کیش وین کے ڈرائیور نے بتایا کہ یہ گاڑی پہلے بھی کئی دفعہ لٹ چکی ہے، ہم جوہر کمپلیکس پر کھڑے تھے، میرے ساتھ لوڈر تھا، میں جیسے ہی ڈرائیور سیٹ پر بیٹھا، دو بندے آئے اور مجھے یرغمال بنا کر لے گئے، وہ ٹوٹل 4 یا 5 افراد تھے۔ڈرائیور نے بتایا کہ خوش قسمتی سے ہمارا ایک سیلز مین بھاگنے میں کامیاب ہو گیا جس نے ہمارے افسران کو اطلاع کر دی، جس کے بعد پولیس آ گئی اور مقابلہ ہوا۔
