اسلام آ باد (مانیٹرنگ ڈیسک ، آئی این پی )تیزی سے بدلتی سیاسی صورتحال میں بیوروکریسی نے بھی سوچ بچار شروع کر دی۔جنگ اخبار کی رپورٹ کے مطابق وفاق میں تعینات سینئر بیوروکریٹس کے اپوزیشن لیڈر شہباز شریف سمیت اپوزیشن سے رابطے ہیں۔متعدد سینئر بیوروکریٹس
نے شہباز شریف کو حکومتی امور کے حوالے سے بریفنگ دی۔رپورٹ میں مزید بتایا گیا ہے کہ سینئر بیوروکریٹس ہائی پاور بورڈ نہ بلانے پر وزیراعظم عمران خان سے بھی نالاں ہیں۔وزیراعظم عمران خان متعدد بار گریڈ 22 میں ترقیوں کا اجلاس بلا کر منسوخ کر چکے ہیں۔دوسری جانب پاکستان مسلم لیگ(ن)کے صدر اور قائد حزب اختلاف شہباز شریف نے کہا ہے کہ بجلی کی قیمت کے ساتھ لوڈ شیڈنگ میں اضافہ انتظامی نااہلی اور نالائقی کی انتہا ہے۔ تفصیلات کے مطابق شہباز شریف نے کے الیکڑک صارفین پر بجلی کی قیمت میں اضافے کی بجلی گرانے کی شدید مذمت کی ہے، ان کا کہنا تھا کہ 3 روپے 27 پیسے فی یونٹ بجلی میں اضافہ عوام پر ظلم ہے۔ انہوں نے کہا کہ یہ اقدامات قیامت خیز مہنگائی کی شدت اور بڑھا رہے ہیں، مہنگائی پہلے ہی عوام کی برداشت سے باہر ہے، بجلی کی قیمت کے ساتھ لوڈشیڈنگ میں اضافہ انتظامی نااہلی اور نالائقی کی انتہا ہے۔ ان کا کہنا تھا کہ ساڑھے تین سال میں انتظامی نظام کا بیڑہ غرق کردیا گیا ہے، مسلم لیگ (ن) 14000 میگا واٹ بجلی دے کر گئی تھی جسے موجودہ حکومت عوام تک پہنچا بھی نہیں سکی۔
