اسلام آباد (این این آئی)پاکستان مسلم لیگ (ن) کے صدر اور قومی اسمبلی میں اپوزیشن لیڈر شہباز شریف نے وزیراعظم عمران خان پر وار کرتے ہوئے کہا ہے کہ تم نے ایبسولیوٹلی ناٹ کہا یہ سب ڈرامہ ہے۔پی ڈی ایم جلسے سے خطاب کرتے ہوئے شہباز شریف نے کہا کہ آپ نے

دن رات جھوٹ بولا، یوٹرن لیا، کیا ریاست مدینہ میں ایسا کوئی سوچ سکتا ہے؟انہوں نے کہا کہ عمران نیازی کے پونے چار سالہ کرتوتوں کے خلاف تحریک عدم اعتماد پیش کردی ہے، عمران نیازی نے ریاست مدینہ کی بات کرکے کارٹلز کو کرپشن کا موقع دیا۔قومی اسمبلی میں اپوزیشن لیڈر نے کہا کہ عمران نیازی نے عوام کو کنگال کردیا ہے، قوم کے اربوں کھربوں روپے کے وسائل برباد ہوگئے، بتایا جائے کیا یہ مہنگائی اور غربت بین الاقوامی سازش کا نتیجہ ہے؟۔مسلم لیگ (ن) کے صدر نے کہا کہ عمران نیازی خودداری سیکھنی ہے تو نواز شریف سے سیکھو، نواز شریف نے بھارت کے 5 ایٹمی دھماکوں کے جواب میں 6 دھماکے کیے۔انہوںنے کہاکہ نواز شریف نے امریکی صدر سے کہا پیسے نہیں اپنی قوم کی خودداری چاہیے، خوددار نہیں خود غرض ہو تم، قوم کے اوپر قرض ہو تم۔شہباز شریف نے کہا کہ پاکستان میں محرومیاں راتوں رات ختم نہیں ہوں گی اس کیلئے وقت لگے گا، ہم کمر بستہ ہوجائیں تو مسائل حل ہوسکتے ہیں۔