اسلام آباد (این این آئی)پاکستان مسلم لیگ (ن) کی سینئر رہنماء مریم نواز شریف نے کہا ہے کہ نوازشریف کو 3 بار وزارت عظمی کے عہدے سے ہٹایا گیا لیکن انہوں نے ملکی سلامتی پر آنچ نہیں آنے دی،نہ کسی پر جھوٹے الزام لگائے، اس سے زیادہ ملکی سلامتی کے لیے خطرناک بات
اور کیا ہوسکتی ہے کہ ملک کا وزیراعظم اپنا اقتدار بچانے کے لیے جھوٹی سازشوں کا ڈرامہ کر کہ ملک کا تماشہ بنا دے؟ ۔اپنے ایک ٹوئٹر بیان میں پاکستان مسلم لیگ (ن) کی سینئر رہنماء مریم نواز نے کہا کہ سابق جعلی وزیراعظم آپ تو سب سے بڑے عالمی لیڈر تھے؟کبھی سعودی عرب،ایران کے درمیان ثالثی،کبھی روس یوکرائن کے درمیان ثالثی،یہ اچانک کیا ہوگیا کہ آپ کے خلاف سازش ہوگئی ؟آپ تومغرب کے چہیتے تھے نا؟اقتدار جاتا دیکھ کر پاکستان کی سلامتی سے کھلواڑ مت کرو،سبز ہلالی پرچم پر 35 ٹانکے مت لگائو ۔ انہوں نے کہا کہ تمہارے ہاتھ میں اقتدار بندر کے ہاتھ میں استرا ہے۔خود کو بھی زخمی کر رہے ہو اور پاکستان کو بھی،کل تک تم عدم اعتماد کی دعائیں مانگتے تھے،آج اسے غیر ملکی سازش کہہ رہے ہو؟ حواس پر قابو رکھو،پاکستان کو دنیا بھر میں رسوا نہ کرو، اور اس کی سلامتی سے مت کھیلو۔ مریم نواز شریف نے کہا کہ کسی ملک یا قوم کے لیے اس سے زیادہ خطرناک اور بدقسمتی کی بات اور کیا ہو سکتی ہے کہ ان کے مستقبل اور تقدیر کے فیصے عمران جیسے احمق اور جاہل انسان کریں۔انہوں نے کہا کہ جتنے خطرناک نتائج تمہارے وزیراعظم رہنے سے اس ملک نے بھگتے ہیں، اْن سے زیادہ کا تو تصور بھی نہیں کیا جا سکتا۔
