لاہور(این این آئی) وزیر جیل خانہ جات پنجاب فیاض الحسن چوہان نے کہا ہے کہ پاکستان پیپلز پارٹی اور پی ڈی ایم کے مابین پھوٹ کی دراڑیں مزید واضح ہونا شروع ہو گئی ہیں جس کا واضح ثبوت بلاول زرداری کی مالاکنڈ جلسے میں کی گئی تقریر ہے۔ اپنے بیان میں انہوں نے کہا کہ
بلاول زرداری نے شہباز شریف کو گیٹ نمبر چار سے نہ جانے اور کالا کوٹ نہ پہننے کا طعنہ دے ڈالا۔ فیاض الحسن چوہان کا مزید کہنا تھا کہ شہباز شریف عدم اعتماد سے بے نیاز نواز شریف کی ملک واپسی، شریف خاندان کے خلاف کرپشن کیسز کے خاتمے اور مستقبل قریب میں گرفتاریوں سے بچنے کی ڈیل کے چکروں میں ہیں۔ اس ڈیل کی بھنک پڑتے ہی بلاول زرداری نے شہباز شریف کی گوشمالی میں ایک لمحہ ضائع نہ کیا۔ فیاض الحسن چوہان کا مزید کہنا تھا کہ عوامی سپورٹ کی غیر موجودگی میں عدم اعتماد کی ہنڈیا چولہے چڑھتی نظر نہیں آ رہی۔ وزیراعظم عمران کی قیادت میں حکومت اتحادیوں کے ساتھ مضبوط کھڑی ہے۔ نہ صرف پاکستانی عوام، بلکہ مسلم دنیا کے تمام لیڈران بھی عمران خان کے پیچھے کھڑے ہیں۔ فیاض الحسن چوہان نے کہا عمران خان واحد لیڈر ہیں جو امت مسلمہ کو درپیش مسائل کے حل کے لیے سنجیدگی سے کوشش کر رہے ہیں۔
