اسلام آباد (مانیٹرنگ، این این آئی) جے یو آئی کے سربراہ مولانا فضل الرحمان کی اپیل پر کارکنوں نے ملک بھر میں اہم شاہرائیں بند کر دی ہیں جس سے ٹریفک جام ہو گیا۔ سکھر میں جے یو آئی کے کارکنان نے پنوں عاقل پر دھرنا دے دیا، جے یو آئی کارکنوں نے نواب شاہ میں سکرنڈ روڈ پر دھرنا دے کر ٹریفک بلاک کر دی، جیکب آباد، میرپور خاص، مٹیاری میں بھی کارکنوں نے قومی شاہراہ پر دھرنا دے دیا ہے،

جمعیت علماء اسلام اور پی ڈی ایم کے سربراہ مولانا فضل الرحمن کی کال پر کوئٹہ کے علاقے منان چوک پر جمعیت علماء اسلام کے کارکنوں کا احتجاجی مظاہرہ سڑک پر ٹائر جلاکر حکومت کے خلاف شدیدنعرے بازی کی ۔ جمعرات کی شب جمعیت علماء اسلام ضلع کوئٹہ کے زیراہتمام کوئٹہ کے علاقے منان چوک پر اسلام آباد میں پارلیمنٹ لاجز پر پولیس کی کارروائی اور جمعیت اسلام کے ارکان قومی اسمبلی ،انصارالاسلام کے کارکنوں کی گرفتاری کے خلاف احتجاجی مظاہرہ کیا گیا مظاہرین نے ٹائر جاکرسڑک کو ہرقسم کی آمدورفت کیلئے بند کردیا اور حکومت کے خلاف شدیدنعرے بازی کی ۔اس موقع پر کارکنوں سے خطاب کرتے ہوئے جمعیت علماء اسلام کے رہنماوں مفتی روزی خان ،مولوی سرور موسیٰ خیل ،مولوی خورشید احمد،حاجی بشیرخان ،مولانامحب اللہ سمیت دیگر نے کہا کہ حکومت نے بوکھلاہٹ کاشکار ہوکر پارلیمنٹ لاجز پر حملہ کیا ہے جس سے پارلیمنٹ کا تقدس پامال ہوا جمعیت علماء اسلام کے رضاکاروں ،ارکان پارلیمنٹ کو دانستہ طور پر گرفتار کیا جارہاہے ۔انہوں نے کہا کہ ہم اس قسم کے ہتھکنڈوں سے مرعوب نہیں ہونگے پارٹی کی مرکزی قیادت کی اگلی کال تک ہمارا احتجاج جاری رہے گاجبکہ کارکنوں کو بھی پہنچنے کی ہدایت کردی گئی ہے۔ انہوں نے مطالبہ کیا کہ جمعیت علماء اسلام کے گرفتار ارکان قومی اسمبلی اور کارکنوں کو رہا کیا جائے۔

موضوعات:مولانا فضل الرحمان