کراچی (مانیٹرنگ ڈیسک ، این این آئی)کراچی کے علاقے لیاری سے پاکستان تحریک انصاف کے رکن قومی اسمبلی شکور شاد کے گھر ڈنڈا بردار افراد کے حملے میں ان کا پوتا بھی زخمی ہو گیا۔نجی ٹی وی جیو نیوز کے مطابق پی ٹی آئی ایم این اے کی جانب سے سوشل میڈیا پر سی سی ٹی وی کیمرے سے لی گئی ایک ویڈیو شیئر کی گئی ہے جس میں درجنوں کی تعداد میں افراد کو ان کے گھر پر حملے کے لیے جاتے ہوئے دیکھا جا سکتا ہے۔
ویڈیو کے ساتھ شکور شاد نے ایک کیپشن بھی لکھا ہے جس میں ان کا کہنا ہے کہ کیا ایم این اے کے گھر پر فیڈر لگے ہوئے ہیں جو یہ ڈنڈا بردار نوجوان پتھراؤ کرنے میرے گھر آئے تھے؟شکور شاد کا کہنا تھا کہ پتھراؤ سے میرا 8 سال کا پوتا بھی زخمی ہو گیا، احتجاج سب کا حق ہے اور ہم نے احتجاج کو ہمیشہ ویلکم کیا ہے لیکن اس طرح حملہ آور ہونے سے کیا ہوگا؟دوسری جانب کے الیکٹرک کے ترجمان نے لیاری کے علاقے میں رکن قومی اسمبلی عبدالشکورشاد کے گھر پر ہونے والے احتجاج اور حملے پر اظہار افسوس کرتے ہوئے کہا کہ ہم اس حملے کی شدید الفاظ میں مذمت کرتے ہیں۔ مگر اس واقعے کے لئے کے الیکٹرک کو ذمہ دار ٹہرانا ہرگزدرست نہیں ہے۔کے الیکٹرک کے ترجمان نے وزیر اعظم عمران خان اور گورنر عمران اسماعیل سے اپیل کرتے ہوئے کہا ہیکہ وہ اس بات کو یقینی بنائیں کہ حکومتی نمائندے اور عہدے داران اس قسم کے غیر ذمہ دارانہ بیانات دینے سے گریز کریں۔
تمام عوامی نمائندوں سے درخواست کرتے ہیں کے اپنے علاقوں میں بجلی چوری کی روک تھام اور بروقت بلوں کی ادائیگی کو یقنی بنانے میں اپنا کردار ادا کریں۔بجلی کی پیداوار اور ترسیل کے لئے نرخوں کا تعین وفاقی حکومت کرتی ہے۔ کے الیکٹرک بطور ادارہ مفت بجلی فراہم نہیں کرسکتا۔
