لاہور، لودھراں (مانیٹرنگ، این این آئی)ملتان سلطانز نے گزشتہ روز کراچی کنگز کو شکست دے کر پلے آف مرحلے کے لئے کوالیفائی کر لیا ہے، میچ کے بعد محمد رضوان نے گفتگو کرتے ہوئے جیت کے بعد شکوہ کیا کہ ٹیم کی کارکردگی ٹھیک نہیں تھی، ان کا کہنا تھا کہ بہت ایمان داری سے کہتا ہوں کہ ہماری قسمت
اچھی تھی کہ جیت گئے ورنہ ہم نے آج کے میچ میں اچھی کرکٹ نہیں کھیلی۔اس میچ میں محمد رضوان 76 رنز بنا کر مین آف دی میچ قرار پائے۔دوسری جانب تحریک انصاف کے رہنما جہانگیر ترین کے صاحبزادے اور پی ایس ایل کی ٹیم ملتان سلطانز کے سابق مالک علی ترین نے پی ایس ایل فائنل سے متعلق نئی پیشگوئی کرتے ہوئے کہاہے کہ لگتا ہے فائنل شاید میری فیورٹ ٹیموں ملتان سلطانز اور لاہور قلندرز کے درمیان ہو۔میڈیا سے گفتگو کرتے ہوئے انہوں نے کہا کہ میں نے پہلے پیشگوئی کی تھی کہ پی ایس ایل 7 کا فائنل ملتان سلطانز اور اسلام آباد یونائیٹڈ کے درمیان ہوگا لیکن اب لگتا ہے فائنل شاید میری فیورٹ ٹیموں ملتان سلطانز اور لاہور قلندرز کے درمیان ہو۔علی ترین نے کہا کہ ملتان سلطانز پہلی ٹیم ہوگی جو اپنے ٹائٹل کا دفاع کرے گی۔ انہوں نے کہا کہ پی ایس ایل نے پاکستان کو ہر شعبے میں ویلیو ایڈڈ کیا ہے، ایسی لیگ سے ملک کے وقار، کرکٹ اور معیشت کا فائدہ ہوتا ہے۔علی ترین نے کہا کہ ملتان سلطانز اس ٹورنامنٹ میں بہت خوش قسمت رہی ہے کیونکہ اس ٹیم کا بیلنس کپتان اور مجموعی کارکردگی بہترین ہے۔ انہوں نے کہا کہ خوش دل شاہ بہترین آل راؤنڈر کے طور پر سامنے آیا ہے۔علی ترین نے ملتان سلطانز کے کھلاڑیوں کو مشورہ دیا کہ جو رضوان کہتا ہے اس کی بات سنو۔
