اسلام آباد (مانیٹرنگ ڈیسک / این این آئی)پاکستان مسلم لیگ (ن) کی جانب سے وزیراعظم عمران خان کے خلاف تحریک عدم اعتماد میں ساتھ دینے کیلئے سپیکر پنجاب اسمبلی چوہدری پرویزالٰہی کو وزیراعلی کے عہدے کی پیشکش کی گئی ہے ۔نجی ٹی وی نے ذرائع کے حوالے سے کہا ہے کہ مسلم لیگ کی قیادت کو یہ پیغام مشترکہ سیاسی دوستوں کے ذریعے پہنچایاگیا، پیغام میں مزید کہا گیا ہے کہ

عمران خان کے خلاف تحریک عدم اعتماد میں ساتھ دیں اور آگے بھی مل کر چلیں گے ۔ذرائع نے بتایا کہ (ن) لیگ کی اس پیشکش پر چوہدری پرویزالٰہی نے ابھی تک کوئی جواب نہیں دیا۔ ۔واضح رہے کہ گزشتہ ہفتے سابق صدر مملکت آصف علی زرداری نے حکومتی اتحادی جماعت مسلم لیگ (ق) کی قیادت سے لاہور میں ملاقات کی جس میںملکی سیاسی صورتحال سمیت باہمی دلچسپی کے دیگر امور پر تفصیلی تبادلہ خیال کیا گیا،آصف علی زرداری نے چودھری شجاعت حسین کی خیریت دریافت کی اور ان کی جلد صحت یابی کیلئے نیک خواہشات کا اظہار بھی کیا۔ تفصیلات کے مطابق سابق صدر آصف علی زرداری نے پاکستان مسلم لیگ (ق)کے صدرو سابق وزیراعظم چودھری شجاعت حسین اور قائمقام گورنر پنجاب چودھری پرویزالٰہی سے ان کی رہائش گاہ پر ملاقات کی۔ رہائشگاہ آمد پر چوہدری پرویز الٰہی نے مونس الٰہی، طارق بشیر چیمہ اور سالک حسین کے ہمراہ آصف علی زرداری کا گرمجوشی سے استقبال کیا ۔ اس کے بعد آصف علی زرداری نے چوہدری شجاعت سے ان کی خیریت دریافت کی او ران کی جلد صحتیابی کے لئے نیک خواہشات کا اظہار کیا ۔ ملاقات میںوفاقی وزراء طارق بشیر چیمہ، مونس الٰہی، رکن قومی اسمبلی سالک حسین، شافع حسین اور رخسانہ بنگش بھی شریک تھے۔ ملاقات میں ملکی سیاسی صورتحال سمیت باہمی دلچسپی کے دیگر امور پر تفصیلی تبادلہ خیال کیا گیا۔ میڈیا رپورٹس کے مطابق چوہدری برادران اور آصف زرداری کے درمیان ملاقات دو گھنٹے تک جاری رہی اور ملاقات کے دو دور ہوئے ۔ پہلی ملاقات میںدیگر رہنمائوںکی موجودگی میں جبکہ دوسری ملاقات چوہدری برادران اور آصف علی زرداری شریک ہوئے ۔ روزنامہ جنگ اخبار کی رپورٹ کے مطابق آصف علی زرداری نے چوہدری برادران کو سیاسی تبدیلی کا ایجنڈا پیش کیا اور ق لیگ کو پنجاب میں اہم عہدہ دینے کی پیشکش کی جس پر چوہدری شجاعت نے معذرت کرتے ہوئے کہا کہ ہمارا معاہدہ ہے،5 سال حکومت کا ساتھ نہیں چھوڑ سکتے،چوہدری شجاعت نے کہا کہ نیا تجربہ نہ کریں، پی ڈی ایم کے اپنے اندر اختلافات ہیں۔