کراچی(این این آئی)ایڈمنسٹریٹر کراچی اور ترجمان سندھ حکومت بیرسٹر مرتضی وہاب کی صدارت میں اعلی سطحی اجلاس منعقد ہوا، اجلاس میں بڑھتی ہوئی مہنگائی کے پیش نظر کراچی میں کم قیمت ہائوسنگ اسکیم متعارف کرانے کا فیصلہ کیا گیا۔اجلاس میں بیرسٹر مرتضی وہاب نے کہاکہ پبلک پرائیویٹ پارٹنر شپ کے تحت شہریوں کے لئے ہائوسنگ اسکیم متعارف کروائی جائے گی، کم قیمت ہائوسنگ اسکیم کم آمدنی والے
طبقے کو رہائشی سہولت مہیا کرے گی، پروجیکٹ ڈائریکٹر اورنگی کو رہائشی اسکیم کے لئے زمین کا سروے کرنے کی ہدایت کی ہے، دیگر علاقوں میں بھی ہائوسنگ اسکیم بنانے کے لئے محکمہ لینڈ سروے شروع کرے گا۔اس موقع پر انہوں نے کہا کہ عوام مہنگائی کے ہاتھوں پریشان ہے اور لا تعداد لوگوں کو سر چھپانے کی جگہ درکار ہے، پیپلز پارٹی کے وژن کے مطابق عوام کو رہائشی سہولتیں مہیا کرنے کے لئے اقدامات کررہے ہیں۔
