اسلام آباد (این این آئی) پاکستان تحریک انصاف کی رکن قومی اسمبلی اور پارلیمانی سیکرٹری اوورسیزپاکستانیز جویریہ ظفر پر حملے کے کیس میں ان کے خاوند حیدر علی کی درخواست ضمانت منظور ہوگئی۔اسلام آباد کی مقامی عدالت کے جوڈیشل مجسٹریٹ ملک امان نے

ملزم حیدر علی کی درخواست ضمانت منظور کی۔ عدالتی حکم پر ملزم حیدرعلی نے ڈیڑھ لاکھ روپے زر ضمانت مچلکہ جمع کروایا۔وکیل ملزم کا مؤقف ہے کہ مدعیہ جویریہ ظفر نے عہدے کا غلط استعمال کرتے ہوئے مقدمہ درج کروایا ہے۔خیال رہے کہ 2 فروری کو جویریہ ظفر نے اسلام آباد کے ویمن تھانے میں مقدمے کی درخواست دی تھی جس میں انہوں نے مؤقف اپنایا تھا کہ ان کا حیدر علی سے 6 ماہ قبل نکاح ہوا تھا، شوہر سے معمولی جھگڑا ہوا جس پر کورٹ سے خلع لینے کا کہا تو شوہر نے انہیں اور گھر والوں کو جان سے مارنے کی دھمکی دی۔جویریہ ظفر کے مطابق شوہر نے ان کے سر پر پستول تان کر فائرنگ کی جس سے وہ بچ گئیں اور گولی دیوار پر جالگی، انہوں نے بھاگ کر جان بچائی۔ بعدازاں خاتون ایم این اے کی شکایت پر پولیس نے ملزم کو گرفتارکرلیا تھا۔