اسلام آباد(آن لائن ) وزیراعظم عمران خان سے سعودی وزیر داخلہ پرنس عبدالعزیز بن سعود بن نائف نے ملاقات کی جس میں وزیراعظم نے اسلامی اتحاد کو فروغ دینے میں خادم حرمین شریفین شاہ سلمان بن عبدالعزیز آل سعود کے قائدانہ کردار کی تعریف کی۔وزیراعظم نے خطے اور اس سے باہر امن و سلامتی کے لیے مملکت سعودی عرب کی کوششوں کا اعتراف کیا

جبکہ وزیراعظم نے سعودی ولی عہد شہزادہ محمد بن سلمان کے سعودی عرب کی ترقی اور خوشحالی کے وژن اور پاکستان ، سعودی عرب کے درمیان پائیدار برادرانہ تعلقات میں ان کے گراں قدر تعاون کو بھی سراہا۔وزیراعظم عمران خان نے خاص طور پر مشکل وقت میں پاکستان کی مستقل حمایت پر مملکت کا شکریہ ادا کیا جبکہ وزیراعظم نے پاکستان کو دی جانے والی حالیہ مالیاتی بجٹ امداد پر بھی سعودی قیادت کا شکریہ ادا کیا۔عمران خان نے سعودی عرب کی جانب حوثی ملیشیا کے حملوں کی مذمت کی جبکہ وزیراعظم عمران خان نے مملکت کی سلامتی، خودمختاری اور علاقائی سالمیت کے لیے پاکستان کی مکمل حمایت کا اعادہ بھی کیا۔وزیراعظم نے بڑی پاکستانی کمیونٹی کی میزبانی پر سعودی قیادت کا شکریہ ادا کیا جبکہ عمران خان نے عوام سے عوام کے روابط کو مزید مضبوط بنانے کی ضرورت پر بھی زور دیا۔دونوں ممالک کے درمیان مجرموں کی منتقلی کے معاہدے پر وزیراعظم عمران خان نے ذکر کرتے ہوئے کہا کہ امید ہے اس فریم ورک کے ذریعے کے ایس اے میں پاکستانی قیدیوں کی ایک بڑی تعداد کو پاکستان واپس بھیجا جائے گا۔ملاقات میں سعودی وزیر داخلہ شہزادہ عبدالعزیز بن سعود بن نائف نے وزیر اعظم کو ولی عہد شہزادہ کی جانب سے تہنیتی پیغام پیش کیا جبکہ سعودی وزیر نے مملکت کی ترقی میں پاکستانیوں کے مثبت کردار کا بھی اعتراف کیا۔شہزادہ عبدالعزیز بن سعود بن نائف نے پاکستان اور سعودی عرب کے درمیان قریبی برادرانہ تعلقات کا اعادہ کیا جبکہ سعودی وزیر داخلہ نے اپنی وزارت سے متعلق تمام معاملات پر پاکستان کے ساتھ مل کر کام کرنے کے عزم کا بھی اعادہ کیا۔