اسلام آباد(آن لائن)پاکستان ڈیموکریٹک موومنٹ(پی ڈی ایم )نے سانحہ مری کا ذمہ دار حکومت اور انتظامیہ کو قرار دے دیا۔ترجمان پی ڈی ایم حافظ حمد اللہ نے اپنے
ایک بیان میں کہاکہ تمام تر اموات کا ذمہ دار پنجاب اور عمران خان کی نااہل اور بے حس حکومت ہے، محکمہ موسمیات نے چنددن پہلے شدید برف باری ہونے سے آگاہ کیا تو حکومت نے مری میں پیشگی حفاظتی اقدامات اور حکمت عملی کیوں ترتیب نہیں دی، حافظ حمداللہ نے کہاکہ حکومت مری جانے والے سیاحوں کو مینج کرنے کی صلاحیت نہیں رکھتی وہ دنیا بھر کے سیاحوں کو کس منہ سے پاکستان کوآنے کی دعوت دیتی ہے، کل شام تک حکومتی وزرا لاکھوں لوگوں کے مری جانے کا کریڈٹ لیتے رہے، حافظ حمداللہ نے کہاکہ مری کے سڑکوں پر معصوم لوگ شدید سردی سے مرتے رہے مگر عمران کٹھ پتلی وفاقی اور پنجاب حکومت سوتی رہی، عمران خان نے اموات کا ذمہ دار موت کے منہ میں جانے والے سیاحوں کو ہی قرار دیاجو افسوسناک ہے ۔انہوں نے کہاکہ پی ڈی ایم فیصلہ کر چکی ہے کہ عمران خان اور پاکستان ایک ساتھ نہیں چل سکتا۔
