لندن(این این آئی )تاریخ کا پہلا موبائل میسج (ایس ایم ایس)میری کرسمس ایک لاکھ 21 ہزار ڈالر میں نیلام کر دیا گیا۔میڈیارپورٹس کے مطابق برطانوی ٹیلی کام کمپنی نے تاریخی میسج کی نیلامی سے حاصل رقم سے متعلق بتایا کہ ایک لاکھ
21 ہزار ڈالر اقوام متحدہ کی پناہ گزین ایجنسی کو دیئے جائیں گے۔واضح رہے کہ 29 سال قبل 3 دسمبر 1992 کو ایس ایم ایس کے خالق اور برطانوی کمپیوٹر پروگرامر نیل پیپ ورتھ نے کمپیوٹر کے ذریعے اپنے ساتھی رچرڈ جاروِس کو ایس ایم ایس بھیجا تھا۔نیل پیپ ورتھ نے اپنے پہلے ایس ایم ایس میں اپنے دوست کو کرسمس کی مبارکباد میری کرسمس بھیجی تھی۔پیپ ورتھ کا اپنے ایک انٹرویومیں کہنا تھا کہ 1992 میں مجھے ذرا سا بھی یہ خیال نہیں آیا تھا کہ ٹیکسٹ میسیجنگ کس قدر مقبول ہو جائے گی اور یہ ایجاد اس قدر مقبول ہوگی کہ اسے ایموجی کی شکل میں پیش کیا جانے لگے گا۔انہوں نے کہا تھا کہ جب میں ماضی کو یاد کرتا ہوں تو مجھے خیال آتا ہے کہ میرے ہی بھیجے ہوئے میسیج نے موبائل کی دنیا میں انقلاب برپا کر دیا اور تاریخ رقم کی۔
