اسلام آباد ( آن لائن)حکمران جماعت تحریک انصاف کے اراکین پارلیمنٹ بھی گیس کی شدید قلت پر اپنے وزراء پر برس پڑے اور وفاقی وزیر برائے توانائی حماد اظہر کے فون نہ اٹھانے اور مسئلہ حل نہ کرنے پر وزیر اعظم سے شکایت بھی کر دی ۔تفصیلات کے مطابق تحریک انصاف کراچی سے رکن قومی اسمبلی آفتاب صدیقی نے ایک خط وفاقی وزیر حماد اظہر کو لکھا ہے جس میں کہاگیا ہے کہ
ان کا حلقہ ڈیفنس کراچی میں آتا ہے مگر وہاں پر بھی اکتوبر سے گیس کا شدید بحران ہے جس کی وجہ سے لوگوں کو سخت مسائل کا سامنا ہے اور وہ ہماری حکومت کو برا بھلا کہہ رہے ہیں ،رکن قومی اسمبلی نے کہا کہ میں نے حماد اظہر کو کئی بار ٹیلی فون کیا ،مسیجز کئے مگر انہوں نے فون سننا بھی گوارا نہیں کیا، مسیجز کا بھی جواب نہیں دیا جو کہ انتہائی افسوس ناک ہے اور وفاقی وزیر کا یہ رویہ انتہائی شرمناک اور بے حسی پر مبنی ہے ،رکن قومی اسمبلی نے مزید لکھا کہ وفاقی وزیر اگر منتخب نمائندوں کے فون نہیں اٹھائیں گے ،مسائل حل نہیں کریں گے تو پھر کراچی کے بلدیاتی انتخابات میں بھی ہمارا وہی حشرہ ہوگا جو خیبر پختونخواہ کے انتخابات میں ہوا ۔کیونکہ گیس بحران کی وجہ سے عوام کا غصہ بڑھ رہا ہے ،آفتاب صدیقی نے اپنے خط کی ایک کاپی وزیرا عظم عمران خان کو بھی بھجوائی ہے ۔
