نواب شاہ(این این آئی) سابق صدر مملکت اور پاکستان پیپلزپارٹی کے شریک چیئرمین آصف علی زرداری نے کہا ہے کہ اس تبدیلی نے ملک کو تباہ کردیا، ہم ہی اسے تباہی سے نکالیں گے کیوں کہ یہ ملک ہمارا ہے۔ پیپلزپارٹی پاور میں ہے تو عوام پاور میں ہیں۔ووٹوں کی طاقت سے بہت جلد پھر ملک کی باگ دوڑ پیپلزپارٹی کے ہاتھ میں ہوگی۔وہ بدھ کو نواب شاہ میں پارٹی رہنما راضی خان جمالی سے

بھائی کے انتقال پر تعزیت کے بعد میڈیا سے گفتگو کررہے تھے ۔آصف علی زرداری نے کہا کہ پیپلز پارٹی نے کبھی بڑے بڑے دعوے نہیں کیے البتہ چھوٹے دعوے کرکے بڑے کام ضرور کیے، یہ بات کچھ لوگوں کو سمجھ کیوں نہیں آتی؟انہوں نے کہا کہ اقتدار سے پہلے کوئی دعوی نہیں کیا تھا کہ 18 ویں ترمیم لاؤں گا، اقتدار سے پہلے یہ نہیں کہا تھا بلوچستان کو حق یا کے پی کے کو نام دلاؤں گا۔سابق صدر نے کہا کہ اگر میں یہ باتیں کہتا تو مجھے اقتدار میں آنے ہی نہیں دیتے، الحمد اللہ تاریخ میں ہم نے وہ کام کیے جوان سے نہیں ہونے، ان سے تو ملک نہیں چل رہا لیکن ہم چلائیں گے۔انہوں نے کہا کہ ووٹوں کی طاقت سے بہت جلد پھر ملک کی باگ دوڑ پیپلزپارٹی کے ہاتھ میں ہوگی، اس تبدیلی نے ملک کو تباہ کردیا، ہم ہی اسے تباہی سے نکالیں گے کیوں کہ یہ ملک ہمارا ہے۔آصف زرداری نے کہا کہ ہمارے پاس تیل ہے گیس ہے اور کوئلہ ہے، سب معدنیات کے باوجود غلط حکومتی پالیسوں سے معیشت کو نقصان پہنچا،70سال میں اتنا نقصان نہیں پہنچا جتنا اس حکومت میں پہنچا۔انہوںنے کہا کہ اس بار ایسا ماسٹر پلان بنایا ہے کہ ملک ترقی و خوشحالی کی راہ پر گامزن ہوگا اور صوبہ سندھ ہی پورے ملک کو چلا سکتا ہے۔بعد ازاں سابق صدر نوابشاہ کے قریبی گاؤں کرم خان جمالی پہنچے اور ڈاکٹر علی خان جمالی سے ان کے والد میر مقبول جمالی کے انتقال پر تعزیت کی۔ آصف علی زرداری نے مرحوم کے ایصال ثواب کے لیے فاتحہ خوانی کی ۔اس موقع پر ضیا الحسن لنجار، علی حسن زرداری، علی اکبر جمالی، غلام قادر چانڈیو، عبدالستار کیریو اور دیگر رہنما بھی موجود تھے۔