اسلام آباد(آن لائن )پاکستان عوامی لیگ نے ملک میں صدارتی نظام کے لیے تحریک چلانے کا اعلان کر تے ہوئے کہا ہے کہ صدارتی نظام کے بغیر اب پاکستان آگے نہیں بڑھ سکتا۔ عوام فرسودہ نظام سے چھٹکارا حاصل کرنے کے لیے نکلیں۔ ان خیالات کا اظہار پاکستان عوامی لیگ کے چیئرمین چوہدری ناصر محمود نے مرکزی عہدے داروں کے
ہمراہ نیشنل پریس کلب، اسلام آباد میں پریس کانفرنس سے خطاب کرتے ہوئے کیا ۔ چوہدری ناصر محمود نے پاکستان میں صدارتی نظام کی جدوجہد شروع کرنے کا اعلان کیا اور کہا اس ناگزیر مقصد اور سوچ سے ہم آہنگ شخصیات کو پارٹی میں شامل کرنے کے لیے تنظیم نو کی جا رہی ہے تاکہ ملک گیر سطح پر صدارتی نظام کے لیے جاندار تحریک چلائی جا سکے۔ چوہدری ناصر محمود نے کہا پاکستان عوامی لیگ الیکشن کمیشن میں باضابطہ طور پر رجسٹرڈ اور انتخابی نشان ہاکی کی حامل سیاسی جماعت ہے۔ آج ہم پارلیمانی نظام کے خلاف تاریخی جدوجہد کا آغاز کر رہے ہیں، صدارتی نظام ہی وقت کی اہم ضرورت ہے ، ہم عملی جدوجہد سے مسائل میں الجھے عوام کی مدد کریں گے۔چوہدری ناصر محمود کا کہنا تھا قیام پاکستان سے لے کر اب تک ملک میں صرف اشرافیہ اور مافیا نے ترقی کی۔ اس موقع پر سیاسی جماعت کی تنظیم نو کا بھی اعلان کیا گیا ۔پریس کانفرنس سے وائس چیئرمین سید مظہر علی شاہ، جوائنٹ سیکرٹری اسد الحق قریشی، سینئر رہنما و مرکزی چیف آرگنائزر لالہ قیوم، صدر عبدالحمید ملک ایڈووکیٹ، ایڈیشنل سیکرٹری جنرل محمد لطیف عباسی، ممبر سی ای سی راجہ آفتاب و دیگر رہنماؤں نے بھی پریس کانفرنس سے خطاب کیا اور کہا عام آدمی 50سال سے مہنگائی کی چکی میں پس رہا ہے، پارلیمانی نظام میں عام آدمی انصاف کے لئے نسل در نسل ترستا رہتا ہے، اس نظام کی تجارتی پالیسیاں سرمایہ داراروں کے مفاد کیلئے بنائی گئی ہیں۔
