ملتان (مانیٹرنگ ڈیسک) ملتان سے تعلق رکھنے والے کرکٹر حافظ غلام محمد جو کہ پاکستان کرکٹ بورڈ کے انڈر 16 کے کھلاڑی تھے، ان کے بارے میں سماجی رابطے کی

ویب سائٹ ٹوئٹر پر شعیب جٹ نے اپنے پیغام میں کہا کہ لودھراں سٹیڈیم میں انہیں کرنٹ لگا تھا جس کے باعث ان کی ٹانگوں میں کمزوری ہو گئی اور پاؤں کی انگلیوں کو بھی نقصان پہنچا، انہوں نے اپنی معذوری کو مجبوری نہ بننے دیا، 22 سال غلام محمد نے کرکٹ کی دنیا میں بڑا کارنامہ انجام دیتے ہوئے تیز ترین سنچری بنانے کا قومی ریکارڈ بنا ڈالا۔انہوں نے صرف 17 گیندوں پر تیز ترین نصف سنچری اور 27 گیندوں پر سنچری بنا کر ریکارڈ قائم کر دیا، انہوں نے 35 گیندوں کا سامنا کیا اور 125 رنز بنائے، جس میں پندرہ چھکے اور سات چوکے شامل تھے۔ حافظ غلام محمد نے نجی ٹی وی سے بات چیت کرتے ہوئے کہا کہ میرے سینئرز نے حادثے کے بعد مجھے حوصلہ دیا اور گھر والوں کے تعاون کی وجہ سے آج میں نے کامیابی حاصل کی ہے۔ واضح رہے کہ حافظ غلام محمد کے ساتھ یہ حادثہ 2018ء میں پیش آیا تھا۔