ڈھاکہ(مانیٹرنگ ڈیسک ، این این آئی)قومی کرکٹ ٹیم کے کپتان محمد رضوان نے اپنے خصوصی تکیے سے متعلق اہم انکشاف کیا ہے۔آئی سی سی ٹی ٹوئنٹی ورلڈ کپ 2021ء کے سلسلے میں ہونے والے میچز کے دوران جہاں محمد رضوان نے کروڑوں دلوں میں گھر کیا وہیں اُن کے تکیے نے بھی بھرپور توجہ حاصل کی۔محمد رضوان کے اس تکیے کی باز گشت

کئی دنوں تک سوشل میڈیا پر رہی جس سے متعلق کرکٹ کے متوالے، محمد رضوان کے فینز جاننا چاہتے تھے کہ وہ سفر کے دوران ایک مخصوص تکیہ اپنے ساتھ کیوں رکھتے ہیں۔اس سے متعلق اب محمد رضوان کا ایک ویڈیو بیان سوشل میڈیا پر خوب وائرل ہو رہا ہے جس میں ان کا بتانا ہے کہ ’اُنہیں گردن کے پٹھوں میں درد کی شکایت رہتی ہے جس کے نتیجے میں یہ معالج کی جانب سے تجویز کیا گیا ایک ’میڈیکیٹڈ پلو‘ ہے، اس کے بغیر وہ سو نہیں سکتے۔محمد رضوان کا کہنا ہے کہ ’اس تکیے کو وہ ہر جگہ اپنے ساتھ اس لیے رکھتے ہیں کہ کسی بھی عام تکیے کا استعمال اُن کی گردن کے درد کو جگا دیتا ہے اور اُنہیں پٹھوں کے مسائل شروع ہو جاتے ہیں۔اُن کا کہنا ہے کہ ’وہ اس تکیے کے بغیر ایک رات بھی نہیں گزار سکتے اسی لیے وہ اس کے ساتھ ہی ہر جگہ سفر کرتے ہیں۔‘علاوہ ازیں پاکستان کے وکٹ کیپر بلے باز محمد رضوان کے لیے سال 2021

انتہائی شاندار رہا انہوں نے رواں سال اپنی بہترین کارکردگی سے متعدد اعزازات اپنے نام کرلیے ہیں۔محمد رضوان نے سال 2021 میں اب تک 86.08 کی اوسط سے 1ہزار 33 ٹی ٹوئنٹی انٹرنیشنل رنز بنائے ہیں جو کہ ایک کیلنڈر ایئر میں سب سے زیادہ ہیں، وہ ایک کیلنڈر ایئر میں ہزار ٹی ٹوئنٹی انٹرنیشنل رنز بنانے والے دنیا کے پہلے بیٹر بھی ہیں۔رواں سال ٹیسٹ کرکٹ

میں سب سے زیادہ رنز بنانیکا اعزاز انگلش بلے باز جو روٹ نے حاصل کیا ہے، انہوں نے 66.33 کی اوسط سے 1455 رنز بنائے ہیں۔ون ڈے کرکٹ میں رواں سال سب سے زیادہ رنز آئرش بلے باز پال اسٹرلنگ نے بنائے ہیں، جنہوں نے 54.23 کی اوسط سے 705 رنز بنائے ہیں۔