اسلام آباد ( آن لائن) وزیر اعظم عمران خان سابق آرمی چیف اور سابق ڈی جی آئی ایس آئی کے خلاف مقدمہ کے سوال پر مسکرا دیئے ۔تفصیلات کے مطابق بدھ کے روز سپریم کورٹ نے وزیر اعظم عمران خان کو سانحہ اے پی ایس کیس میں طلب کیا ،وزیر اعظم جب سپریم کورٹ پہنچے
تو صحافیوں نے انہیں گھیر لیا اور سوال کیا کہ کیا سابق آرمی چیف ڈی جی آئی ایس آئی کے خلاف مقدمہ درج کروائیں گے؟جس پر عمران خان صحافیوں کے سوالوں پر مسکراتے ہوئے کمرہ عدالت میں داخل ہوگئے ۔اس سے قبل سپریم کورٹ میں طلبی کے بعد وزیراعظم عمران خان نے اٹارنی جنرل خالد جاوید سے وزیرا عظم ہائوس میں مختصر ملاقات کی ۔ ذرائع کے مطابق ملاقات میں وزیراعظم عمران خان نے اٹارنی جنرل سے سانحہ آرمی پبلک اسکول ازخود نوٹس کیس پر بریفنگ لی جبکہ سپریم کورٹ کے ججز کی جانب سے ممکنہ سوالات اور جوابات پر بھی مشاورت کی اور بعد ازاں سپریم کورٹ پیشی کیلئے روانہ ہوگئے،علاوہ ازیں وزیراعظم عمران خان کی سپریم کورٹ آف پاکستان میں پیشی کے موقع پر سکیورٹی ہائی الرٹ کر دی گئی ،تفصیلات کے مطابق سپریم کورٹ نے اے پی ایس کیس میں وزیر اعظم عمران خان کو پیش ہونے کے احکامات دیئے ،وزیر اعظم نے اٹارنی جنرل سے مشاورت کے بعد عدالت پیش ہونے کا فیصلہ کیا جس کے بعد سپریم کورٹ میں سکیورٹی ہائی الرٹ کر دی گئی ، پولیس اور رینجر ز کی اضافی نفری بھی تعینات کر دی گئی۔
