اسلام آباد( آن لائن )وزیراعظم عمران خان سے اتحادیوں کی ملاقات کی اندرونی کہانی منظر پر آگئی ۔ اتحادیوں نے وزیراعظم سے ملاقات کے دوران الیکٹرانک ووٹنک مشین پر اعتماد میں نہ لینے کا معاملہ اٹھا دیا۔ذرائع کا کہنا ہے کہ اتحادیوں نے اہم قانون سازی پر اعتماد میں نہ لینے

کا شکوہ کیا اور الیکٹرانک ووٹنگ مشین( ای وی ایم) پر تفصیلی بریفنگ کا مطالبہ بھی کیا۔ اتحادیوں کا کہنا ہے کہ حکومت اپنے طور پر اس قسم کے اہم فیصلوں سے گریز کرے،آج تک اتحادیوں کو الیکٹرانک ووٹنگ مشین پر کوئی بریفنگ نہیں دی گئی۔ ذرائع نے بتایا کہ اتحادیوں نے وزیراعظم عمران خان سے یہ مطالبہ کیا کہ ای وی ایم کے استعمال، طریقہ کار اور فنکشن پر تفصیلی بریفنگ دی جائے تا کہ ہمیں بھی معلوم ہو سکے کہ یہ مشین پاکستان کے سیاسی انتخابی نظام پر کس حد تک موثر ہو گی اوریہ مشینیں کس حد تک محفوظ ہیں اوریہ بھی بتایا جائے کہ دیہی علاقوں میں ان مشینوں کو کون استعمال کرے گا، ان مشینوں کی خریداری پر کتنے اخراجات آئیں گے، سیکیورٹی ذمہ داری کس کی ہو گی۔ ذرائع کا کہنا ہے کہ وزیراعظم نے اتحادیوں کا مطالبہ مان لیا ہے اور انہوں نے وزارت سائنس اینڈ ٹیکنالوجی کو اتحادیوں کو تفصیلی بریفنگ کی ہدایات جاری کر دی ہیںجبکہ اتحادیوں کو الیکٹرانک ووٹنگ مشین پر آئندہ ہفتے تفصیلی بریفنگ دیئے جانے کا بھی امکان ہے ۔ ذرائع کے مطابق اتحادیوں نے وزیراعظم کو ہر ممکن حمایت کی یقین دہانی کراتے ہوئے کہا کہ بطور اتحادی حکومت کی حمایت کریں گے، ہمیں اس نظام کے طریقہ کار کا علم ہونا چاہیے۔