اسلام آباد ( آن لائن)ملک بھر میں وزیر اعظم کامیاب جوان پروگرام کے تحت کاروباری قرضوں کی آسان ترسیل کا عمل جاری ہے۔وزیر اعظم کامیاب جوان پروگرام کے تحت ملتان کے نوجوانوں کو اپنا کاروبار کرنے کے لئے اب تک 858.3 ملین روپے کے قرضے دیے جا چکے ہیں۔

وزیر خارجہ شاہ محمود قریشی نے کامیاب جوان کی کامیاب کہانی ٹویٹ کر دی جس کے مطابق ملتان سے تعلق رکھنے والی خاتون اریبہ نے کامیاب جوان پروگرام کے توسط سے قرض حاصل کرکے اپنا بیوٹی پالر کھول لیا ۔اریبہ نے بتایا کہ تعلیم کے ساتھ ساتھ اپنا کاروبار چلانا میرا خواب تھا جو کہ وسائل کی کمی کے باعث پورا ہوتا دکھائی نہ دیتا تھا،اپنا کاروبار کامیابی سے چلا کر اپنے خاندان کا سہارا بن گئی ہوں۔ میرے کاروبار کے وسیلے سے بہت سی خواتین ملازمت حاصل کرکے اپنا روزگار کما رہی ہیں۔ میں کامیاب جوان پروگرام اور نیشنل بنک اف پاکستان کی شکرگزار ہوں جن کی وجہ سے آج میرا مستقبل محفوظ ہے۔ اس موقع پر شاہ محمود قریشی نے کہا کہ نوجوانوں کی تعمیر و ترقی میں حکومت نمایاں کردار ادا کر رہی ہے،وزیرِاعظم عمران خان نوجوانوں کو پاکستان کا قیمتی ترین اثاثہ مانتے ہیں،نوجوانوں کی ترقی اور خوشحالی سے ہی ملک کی ترقی و کامرانی ممکن ہے،کامیاب جوان پروگرام کے تحت بلا تفریق ملک بھر کے نوجوانوں میں صرف میرٹ کی بنیاد پر آسان شرائط پر قرض تقسیم کئے جا رہے ہیں۔