ممبئی (مانیٹرنگ ڈیسک /آن لائن )بمبئی ہائیکورٹ کی جانب سے ضمانت منظور ہونے کے باوجود آج شاہ رخ خان کے بیٹے آریان خان کو آج رہائی نہ مل سکی۔تفصیلات کے مطابق منشیات برآمدگی کیس میں ضمانت مل جانے کے بعد بالی ووڈ کنگ شاہ رخ خان کے بیٹے آریان خان کو
کل آرتھر روڈ جیل سے رہا کردیا جائے گا۔بھارتی میڈیا رپورٹس کے مطابق گزشتہ روز آریان خان کو منشیات کیس میں گرفتاری کے تین ہفتے بعد ضمانت ملی، وہ ضمانت کے بعد کم از کم دو مزید راتیں جیل میں گزاریں گے۔آریان کی ٹیم ممبئی ہائی کورٹ کے درخواست ضمانت کا حکم نامہ جاری ہونے کے بعد ان کی رہائی کے لیے درخواست دے گی۔اس سے قبل کہا جارہا تھا کہ آریان کو ضمانت ملنے کے ایک روز بعد رہا کردیا جائے گا۔خیال رہے کہ بھارت کے انسداد دہشت گردی کے ادارے نارکوٹکس کنٹرول بیورو نے ممبئی میں ساحل کے قریب کروز شپ پر پارٹی کے دوران چھاپا مارکر شاہ رخ خان کے بیٹے آریان خان اور ان کے دوست ارباز مرچنٹ کو گرفتار کیا تھا۔این سی بی کی جانب سے ان پر منشیات رکھنے اور استعمال کرنے کا الزام عائد کیا گیا تھا، جسے پہلے آریان نے مسترد کیا جبکہ بعد میں اس سے متعلق اعتراف بھی کرلیا تھا۔ممبئی ہائی کورٹ میں آریان خان کے وکیل سابق اٹارنی جنرل مکول روہاتگی نے عدالت میں مقف اختیار کیا تھا کہ آریان کی گرفتاری غیر قانونی ہے۔
