لاہور (آن لائن ) سوشل میڈیا پر وائرل ہونیوالے ایک نئے ویڈیو کلپ میں کپتان بابراعظم اور نائب کپتان شاداب خان کو شائقین کرکٹ کو نیوزی لینڈ کرکٹ ٹیم کا مذاق اڑانے سے گریز کرنے کے اشارے دیتے دیکھا جاسکتا ہے۔ ٹویٹر اکاؤنٹ ’چنج آف پیس‘ کے ذریعے ٹویٹ کی گئی
ویڈیو میں پاکستان کرکٹ ٹیم کو نیوزی لینڈ کیخلاف ٹی ٹونٹی ورلڈ کپ کا میچ جیتنے کے بعد گراؤنڈ سے باہر جاتے ہوئے دیکھا جا سکتا ہے۔ویڈیو میں دکھایا گیا ہے کہ جیسے ہی کھلاڑی کراؤڈ کے قریب جاتے ہیں تو شائقین زور سے ”سکیورٹی، سکیورٹی“ کے نعرے لگاتے ہیں۔ شاداب خان جنہیں پہلے تالیاں بجاتے اور مداحوں کی طرف مسکراتے ہوئے دیکھا جا سکتا ہے، اچانک دونوں ہاتھوں سے مجمع کی طرف ہاتھ ہلاتے ہوئے انہیں نعرے لگانے سے روکنے کی تاکید کرتے نظر آتے ہیں۔کپتان بابراعظم جنہیں شاہین آفریدی سے بات کرتے ہوئے دیکھا جا سکتا ہے، وہ بھی مڑ کر ایک ہاتھ سے ہجوم کو بلیک کیپس کا طعنہ دینا بند کرنے کا اشارہ کرتے ہیں۔دلچسپ بات یہ ہے کہ حسن علی شائقین کو اور بھی زور سے نعرے لگانے کیلئے اکساتے ہوئے دیکھے جا سکتے ہیں۔قومی ٹیم کے کپتان اور نائب کپتان کے اس عمل کے بعد سوشل میڈیا صارفین نے انہیں سراہا۔ ’چینج آف پیس‘ نامی اکاؤنٹ نے اس ویڈیو کو شیئر کرتے ہوئے لکھا کہ ’اس پاکستانی ٹیم نے صحت مند اور پیشہ ورانہ رویے کی مثال قائم کی ہے، کپتان بابراعظم اور نائب کپتان شاداب خان پاکستانی شائقین سے نیوزی لینڈ کے لیے اپنے ’سکیورٹی‘ کے نعروں کو کم کرنے کے لیے کہہ رہے ہیں‘۔
