اسلام آباد/لاہور/کراچی/(این این آئی)ٹی ٹونٹی ورلڈ کپ کے دوسرے میچ میں قومی شاہینوں کی جانب سے پاکستان کا دورہ ادھورا چھوڑ کر جانے والی نیوزی لینڈ کی ٹیم کو شکست دینے پر پاکستانیوں نے بھرپور جشن منایا ،کئی علاقوںمیں شائقین کرکٹ گھروں سے باہر نکل آئے
اور نعرہ تکبیر اللہ اکبر ،پاکستان زندہ اور قومی ٹیم کے حق میںنعرے لگاتے ہوئے بھنگڑے ڈالتے رہے ،پاکستانی ٹیم کی جیت کی خوشی میں آتش بازی بھی کی گئی ۔تفصیلات کے مطابق پاکستانی شاہینوں کی نیوزی لینڈ کی ٹیم کو شکست سے ساری قوم میں خوشی کی لہر دوڑ گئی ، شائقین کرکٹ دیوانہ وار ایک دوسرے سے لپٹ گئے اور مبارکبادیںدیتے رہے ۔ نوجوان قومی ٹیم کی جانب سے ہدف حاصل ہوتے ہی نعرہ تکبیر اللہ اکبر،پاکستان زند ہ باد، قومی ٹیم زندہ باد کے نعرے لگاتے ہوئے گھروں سے نکل آئے ۔کئی مقامات پر شائقین کرکٹ گھروں کی چھتوں پر چڑھ گئے اور پاکستانی ٹیم کے حق میں نعرے لگائے ۔ گزشتہ روز بھی بعض علاقوںمیں قومی ٹیم کی کامیابی کی خوشی میں ہوائی فائرنگ بھی کی گئی۔
