اسلام آباد، مکوآنہ (مانیٹرنگ، این این آئی)وفاقی دارالحکومت اسلام آباد میں بھی آٹے کی قیمت میں اضافہ ہو گیا ہے، اسلام آباد 15 کلو آٹے کا تھیلا جو 980 روپے میں مل رہا تھا اب اس کی قیمت 1120 کر دی گئی ہے،
اس طرح پندرہ کلو آٹے کی قیمت میں 140 روپے اضافہ کر دیا گیا ہے، ملک کے دیگر شہروں میں بھی مہنگائی کا یہی حال ہے، اگر مہنگائی اسی تناسب سے بڑھتی رہی تو عوام فاقوں پر مجبور ہو جائیں گے، دوسری جانب جڑانوالہ میں محکمہ فوڈ کی ناقص پالیسی کی وجہ سے آٹے کی قیمت میں اضافہ ہونے لگا مارکیٹ میں آٹا 80 روپے فی کلو جبکہ گندم 2350 روپے فی من فروخت ہونے لگی تفصیلات کے مطابق محکمہ فوڈ کی جانب سے گندم کا کوٹہ فلور ملز مالکان کو 1950 روپے فی من کے حساب سے جاری کیا جا رہا ہے تاکہ آٹا حکومتی نرخوں میں فروخت کروایا جا سکے لیکن محکمہ فوڈ کی ناقص پالیسیوں کی بدولت کوٹہ صرف فلور ملز کو جاری کیا جا رہا ہے اور آٹا چکیوں کو نظر انداز کر دیا گیا ہے مہنگی گندم خرید کر مہنگے داموں آٹے کی فروخت کر رہے ہیں جس کا خمیازہ عام عوام کو بھگتنا پڑ رہا ہے شہریوں کا کہنا ہے کہ زیادہ تر آٹا چکیوں سے خریدتے ہیں جہاں سے با آسانی آٹا مل جاتا ہے جبکہ آٹا چکی مالکان کو گندم کا سرکاری کوٹہ جاری نہ کرنا عوام کے ساتھ سرا سر زیادتی ہے شہریوں نے تحصیل انتظامیہ سے مطالبہ کیا ہے کہ آٹا چکیوں کو سرکاری کوٹہ فراہم کیا جائے تاکہ عوام تک سستا اور معیاری آٹا پہنچ سکے
