لاہور ( ا ٓن لائن ) وزیراعظم عمران خان کو نئے چیف سیکرٹری پنجاب نے نئی طرز حکمرانی کا خاکہ پیش کردیا۔چیف سیکرٹری پنجاب کی جانب سے پیش کر دہ خاکہ میں کرپشن کا تسلسل، مسلسل ٹرانسفر پوسٹنگ، عہدے کی معیاد سے متعلق عدم تحفظ، غلط ٹیم کا انتخاب اور نیب کا ڈر نئی طرز حکمرانی کو خراب کرنے کے بڑے اسباب قرار دیے گئے ہیں۔اس کے علاوہ بلدیاتی نظام کی معطلی اور اشیائے خورونوش کی قیمتوں پر کنٹرول نہ ہونے کی وجہ سے طرز حکمرانی پر منفی اثرات مرتب ہونے کی نشاندہی کی گئی ہے جب کہ تقرریاں میرٹ کی بنیاد پر کرنے کی بھی تجویز دی گئی ہے۔