اسلام آباد(آن لائن)آئی جی پنجاب نے مینار پاکستان میں ٹک ٹاکر عائشہ اکرام کیساتھ دست اندازی کے واقعہ پر سپریم کورٹ کے انسانی حقوق سیل میں رپورٹ جمع کرا دی۔ پیر کو عدالت عظمی کے انسانی حقوق سیل میں آئی پنجاب کی جانب سے جمع کروائی گئی رپورٹ میںبتایا گیا ہے کہ مزکورہ واقعہ کی جامع تحقیقات کیلئے چار خصوصی ٹیمیں تشکیل دی گئیں،تفتیشی ٹیم نے جائے وقوعہ کا دورہ کیا،متاثرہ خاتون کا میڈیکل کرایا گیا،30 ویڈیوز، 60 تصاویر اکٹھی کرکے نادرا کو شناخت کیلئے بجھوائی گئیں، نادرا نے نو افراد کی شناخت کی، پہلے 9 افراد کو گرفتار کیا گیا اور انکی نشاندہی پر
مزید افراد کو بھی گرفتار کیا گیا،اب تک 92 افراد کو گرفتار کیا جا چکا ہے،خفیہ اداروں کی مدد سے جیو فنسنگ ڈیٹا اکٹھا کیا گیا،واقعہ کی شام ساڑھے چھ سے لیکر سات بجکر چالیس منٹ کے دوران اٹھائیس ہزار سے زائد افراد کی جانب سے کی جانے والی کالز کا ڈیٹا اکٹھا کیا گیا، سات سو سے زائد افراد کی کالز کو مشکوک قرار دیا گیا۔ رپورٹ میں سپریم کورٹ کو یقین دہانی کروائی گئی ہے کہ واقعہ میں ملوث افراد کیخلاف بلا تفریق کارروائی کیلئے تمام وسائل بروئے کار لائے جائیں گے، واقعہ کی ہر پہلو سے مکمل تحقیقات کریں گے ،ملوث ملزمان کو سامنے لاکر مثالی سزائیں بھی دلوائی جائیں گی۔ واضح رہے کہ سپریم کورٹ کے انسانی حقوق سیل نے لاہور مینار پاکستان میں ٹک ٹاکر عائشہ اکرام کیساتھ دست اندازی کے واقعہ پر آئی جی پنجاب کو نوٹس جاری کرتے ہوئے رپورٹ طلب کی تھی۔
