شیخوپورہ ٗ کراچی(این این آئی)فیروز والہ میں سی ٹی ڈی اور دہشتگردوں کے مابین فائرنگ کے تبادلے میں 3 دہشت گرد مارے گئے۔ترجمان سی ٹی ڈی کے مطابق خفیہ اطلاعات کی بنیاد پر تحصیل فیروزوالہ کے علاقے گلشن بابر آبادی میں آپریشن کیا گیا، اس دوران دہشت گردوں نے سی ٹی ڈی کی فورس

پر فائرنگ کردی، اور جوابی فائرنگ میں 3 دہشت گرد مارے گئے۔سی ٹی ڈی کے مطابق مارنے جانے والے دہشت گردوں میں احسان اللہ، نعمت اللہ اور عبدالسلام شامل ہیں، اور تینوں کا تعلق افغانستان سے ہے، اور فیروز والا میں کرائے کے مکان میں رہائش پذیر تھے، دہشت گردوں کے قبضے سے دھماکا خیز مواد، ہینڈ گرینڈ اور ڈیٹو نیٹر برآمد ہوئے ہیں۔ترجمان سی ٹی ڈی نے بتایا کہ مارے جانے والے دہشت گرد پولیس، آرمی، شیعہ کمیونٹی اور سرکاری عمارتوں پر حملے کی منصوبہ بندی کر رہے تھے، دہشت گردوں نے اہم شخصیات بالخصوص شیعہ علما کو ٹارگٹ کرنا تھا۔دوسری جانب رینجرز نے نیو کراچی میں ایک بندگودام پر چھاپہ مار کر بڑی تعداد میں اسلحہ برآمد کر لیا۔ترجمان سندھ رینجرز کے مطابق بند گودام پر چھاپہ نیو کراچی کے سیکٹر فائیو ای میں مارا گیا، کارروائی کے دوران گودام سے بھاری مقدار میں اسلحہ برآمد ہوا۔سندھ رینجرز کے ترجمان نے بتایا کہ اسلحہ ایم کیو ایم لندن کے دہشت گردوں نے کراچی آپریشن کے دوران چھپایا تھا، برآمد کیے گئے اسلحے میں 7 کلاشنکوف، 7 رائفلز، 6 رپیٹرز، 10 پستول، ایک ریوالور اور سیکڑوں گولیاں شامل ہیں۔