اسلا آباد(مانیٹرنگ دیسک )نئے سال میں پاکستان کی تمام سیریز ملک میں ہی ہوں گی،ہم نے آئندہ سال نیوزی لینڈ، انگلینڈ، ویسٹ انڈیز اورآسٹریلیا کی میزبانی کرنی ہے ، تماشائیوں کے بغیر کوئی ایونٹ مکمل نہیں ہوتا، پی ایس ایل میں پی سی بی نے تماشائیوں کی کمی شدت سے محسوس کی ۔

تفصیلات کے مطابق چیئرمین پاکستان کرکٹ بورڈ احسان مانی کا کہنا ہے کہ سال 2022 پی سی بی کیلئے بہت اہم ہے ، نئے سال میں پاکستان کی تمام4 سیریز ملک میں ہی ہوں گی،ہم نے آئندہ سال 4ملکوں نیوزی لینڈ، انگلینڈ، ویسٹ انڈیز اورآسٹریلیا کی میزبانی کرنی ہے ۔قومی موقر نامے دنیا کی پورٹ کے مطابق انہوں نے پی ایس ایل کے سیزن 6 کے کامیاب اختتام کے حوالے سے کہا کہ تماشائیوں کے بغیر کوئی ایونٹ بھی مکمل نہیں ہوتا، پی ایس ایل میں پی سی بی نے تماشائیوں کی کمی شدت سے محسوس کی۔ پی ایس ایل کی کامیابی پر تمام فرنچائزز اور منتظمین مبارکباد کے مستحق ہیں۔ احسان مانی نے کہا کہ کسی بھی کھیل کی اصل جان اور پہچان تماشائی ہوتے ہیں، اگلے پی ایس ایل کے ساتویں ایڈیشن میں امید ہے شائقین سٹیڈیم کا رخ کریں گے ، آئندہ ایڈیشن کے انعقاد کیلئے منصوبہ بندی کا باقاعدہ آغاز جولائی سے ہوگا۔انہوں نے کہاکہ وہ پاکستان کرکٹ کے پرجوش شائقین کو یقین دلانا چاہتے ہیں کہ 2022 میں شیڈول ایچ بی ایل پاکستان سپر لیگ کا ساتواں ایڈیشن پاکستان میں کھیلا جائیگا اور اس ایونٹ میں تماشائیوں کوسٹیڈیم میں داخلے کی اجازت ہوگی۔ ان کاکہناتھاکہ میں پرامید ہوں کہ جس طرح ہم نے بحیثیت قوم کورونا وائرس کی وبا سے چھٹکارا حاصل کیا ہے ویسے ہی اب سیزن 22-2021 میں ہماری ساری کرکٹ پاکستان میں ہی کھیلی جائیگی، اس دوران پاکستان کو نیوزی لینڈ، انگلینڈ، ویسٹ انڈیز اور آسٹریلیا کی میزبانی کرنی ہے ۔ ان میچز سے نہ صرف ملک میں کھیل کو فروغ ملے گا بلکہ قومی نوجوانوں کی کرکٹ کے کھیل سے وابستگی کو بھی تقویت ملے گی۔