کراچی (مانیٹرنگ ڈیسک /این این آئی)رواں ماہ صوبہ سندھ کے ضلع گھوٹکی میں ہونے والا دلخراش ٹرین حادثہ الم ومصائب کی ناقابل فراموش داستانیں چھوڑ گیا۔تفصیلات کے مطابق ٹرین حادثے میں ستر سے زائد افراد جاں بحق جبکہ سینکڑوں زخمی ہوئے تھے، ان زخمیوں میں کراچی کی

بارہ سالہ کائنات بھی شامل ہیں جو اپنے بھائی کی شادی میں شرکت کے لئے اہل خانہ کے ساتھ ٹوبہ ٹیک سنگھ جارہی تھی سات جون کو ڈہرکی کے قریب خوفناک ٹرین حادثے کے نتیجے میں دونوں ٹانگیں اور خاندان کے 5 افراد کھو دینے والی بچی نے حکومت سے علاج کرانے کی اپیل کی ہے جس کی ویڈیو سوشل میڈیا پر وائرل ہوگئی۔سوشل میڈیا پر وائرل ویڈیو میں موجود بچی آہ و بکا کرتے ہوئے حکومت سے اپنے علاج کی درخواست کررہی ہے۔ویڈیو میں بچی کا کہنا ہے کہ میرا نام کائنات ہے اور جس روز یہ حادثہ پیش آیا ہم اس روز بھائی کی شادی کے لیے کراچی سے ٹوبہ ٹیک سنگھ جارہے تھے، ٹرین میں ہم 9 لوگ سوار تھے جن میں سے 5 اس حادثے میں انتقال کرگئے۔بچی کے مطابق ٹرین حادثے میں بچ جانے والے 4 افراد میں سے 3 گھر جاچکے ہیں اب اپنے اہل خانہ میں آخری میں ہی ہوں جو ہسپتال میں ہوں۔کائنات نے اپنی ویڈیو میں حکومت اور وزیراعظم عمران خان سے گزارش کی کہ میرا علاج کروایا جائے تاکہ میں اپنی ٹانگوں پر چل اپنے گھر جاؤں۔کائنات کا کہنا تھا میری حکومت سے گزارش ہے کہ میرے ٹھیک ہونے میں مدد کریں تاکہ میں اپنے پیروں پر چل سکوں اور میرے خاندان کے جو لوگ بچ گئے ہیں ان کے ساتھ رہ سکوں۔