لاہور(مانیٹرنگ ڈیسک ، یو این پی)پی سی بی نے بائیو سکیور ببل کی خلاف ورزی کرنے پر پشاور زلمی کے حیدر علی اور عمید آصف کو معطل کر دیا، حیدر علی دورہ انگلینڈ اور ویسٹ انڈیز سے بھی باہر ہو گئے ہیں جبکہ ان کی جگہ صہیب مقصود بطور متبادل کھلاڑی سکواڈ کا حصہ بن گئے ۔ پاکستان کرکٹ بور ڈکی جانب سے جاری کر دہ بیان میں

کہا گیاہے کہ بائیو سکیور ببل کی خلاف ورزی کرنے پر پشاور زلمی کے دو کھلاڑیوں کو معطل کر دیا گیاہے ، ان دونوں کھلاڑیوں کو آج ہونے والے ایونٹ کے فائنل میں شرکت کی اجازت نہیں ہو گی ، دونوں کھلاڑیوں نے نہ صرف ببل کے باہر موجود افراد سے ملاقات کی بلکہ وہ ان افراد سے مقررہ سماجی فاصلہ برقرار رکھنے میں بھی ناکام رہے ، دونوں کھلاڑیوں نے لیگ کے مقررہ پروٹوکولز کی خلاف ورزی کا اعتراف کر لیاہے ۔دوسری جانب پاکستان کرکٹ بورڈ نے ڈیوٹی آف کیئر پالیسی کے تحت اپنے تمام ملازمین کی کووڈ 19 ویکسینیشن کا آغاز کردیا ہے، ویکسی نیشن کا یہ عمل یکم جولائی تک مکمل کرلیا جائے گا۔پہلے مرحلے میں لاہور سے تعلق رکھنے والے پی سی بی ملازمین کی ویکسینیشن گزشتہ روز مقامی ہسپتال میں کی گئی۔ دیگر شہروں سے تعلق رکھنے والے ملازمین کی ویکسی نیشن بھی رواں ماہ کے اختتام تک مکمل کرلی جائے گی۔چیف آپریٹنگ آفیسر پی سی بی سلمان نصیر کا کہنا ہے کہ عالمی وبا کے باوجود پی سی بی کے تمام ملازمین نے بھرپور انداز سے اپنی پیشہ ورانہ ذمہ داریاں نبھائیں، جو کرکٹ سیزن برائے 21ـ2020 کی کامیابی کا سبب بنا۔