گوجرانوالہ، سیالکوٹ(مانیٹرنگ + این این آئی) ڈاکٹر فردوس عاشق اعوان گوجرانوالہ میں ویکسینیشن سینٹر پہنچ گئیں، جہاں پر انہوں نے شہریوں کو ویکسین خود لگانا شروع کر دی، سماجی رابطے کی ویب سائٹ ٹوئٹر پر ویڈیو وائرل ہے جس میں ڈاکٹر فردوس عاشق اعوان نے ایک صحافی کو ویکسین لگائی۔ دوسری جانب معاون خصوصی
وزیر اعلی پنجاب ڈاکٹر فردوس عاشق اعوان نے کہا ہے کہ سیالکوٹ بزنس کمیونٹی کی خدمات قابل تحسین ہیں، اربوں ڈالر کا قیمتی زرمبادلہ کما ملک و قوم کی خدمات کررہے ہیں ان کے مسائل کے حل کیلئے وفاقی اور صوبائی حکومت کوشاں ہے، سیالکوٹ میں معاشی سرگرمیوں کو فروغ دینے کیلئے انڈسٹریل زون کا قیام عمل میں لایا جارہا ہے،سیالکوٹ کی عوام کو معیاری ذرائع مواصلات کی سہولیات کی فراہمی، صحت اور تعلیم کی میعاری سہولیات کی فراہمی کو یقینی بنایا جارہا ہے، سیالکوٹ کی بزنس کمیونٹی کے مسائل بغیر کسی سیاسی و جماعتی وابستگی کی تفریق سے حل کئے جائیں گے۔ ان خیالات کا اظہار انہوں نے ڈپٹی کمشنر سیالکوٹ آفس میں پسرور روڈ پر بزنس کمیونٹی کی پسرور روڈ ایکشن کمیٹی کے ممبران کے اجلاس سے خطاب کرتے ہوئے کہی۔ ڈپٹی کمشنر سیالکوٹ طاہر فاروق،ہمایوں شیخ, چودھری طلعت مسعود ایڈووکیٹ, سہیل سندھا, احسن بھٹہ, علی شیخ زوہیب رفیق, ڈی ڈی ڈویلپمنٹ عبدالروف، ایکسین ہائی وے، گیپکو، سوئی گیس، پی ٹی سی ایل سمیت متعلقہ حکام نے اجلاس میں شرکت کی۔اجلاس میں پسرور روڈ کی تعمیر کا جائزہ لیا گیا۔ معاون خصوصی ڈاکٹرفردوس عاشق اعوان نے ڈپٹی کمشنر سیالکوٹ طاہر فاروق کی جانب سے پسرور روڈ کی تعمیر کیلئے اقدامات پر ان کی کاوشوں کو سراہا۔ اجلاس کے آخر میں ڈپٹی کمشنر طاہر فاروق کی والدہ مرحومہ کے درجات کی بلندی کیلئے خصوصی دعا کی گئی۔
