اسلام آباد(این این آئی)وزیراعظم عمران خان کے معاون خصوصی برائے صحت ڈاکٹر فیصل سلطان نے کہا ہے کہ جن شہریوں نے چین کی تیار کردہ کورونا ویکسین سائنو فارم کی پہلی خوراک لگوائی ہے انہیں دوسری خوراک بھی سائنو فارم کی ہی لگے گی۔اپنے بیان میں فیصل سلطان نے کہا کہ ہم سائنسی بنیادوں پر ویکسین کو مکس اور میچ کو تجویز نہیں کررہے،

سائنوفارم ویکسین ویکسینیشن مراکز میں موجود ہے، لوگوں سے گزارش ہے ویکسینیشن لازمی کروائیں، یہ غلط بات ہے کہ سائنو فارم ویکسین ختم کر دی گئی ہے۔وزیراعظم کے معاون خصوصی صحت ڈاکٹر فیصل سلطان نے کہا ہے کہ ملک میں کورونا کیسز کی شرح میں کمی آنا شروع ہوگئی ہے، کورونا کیسز میں کمی ایس اوپیز پر عملدرآمد کی وجہ سے آئی ہے۔انہوں نے بتایا کہ پاکستان میں اب تک 38 لاکھ سے زائد ویکسین کی خوراکیں لگائی جاچکی ہیں، 38 لاکھ سے زائد خوراکوں میں سے 4329 کے منفی اثرات سامنے آئے، ویکسین سے متعلق منفی اثرات معمولی نوعیت کے رپورٹ ہوئے، 90 فیصد شکایات انجکشن کی جگہ درد اور بخار کی تھیں، ویکسین کے باعث 6 سنگین نوعیت کے واقعات سامنے آئے، ہر کیس کی اچھی طرح سے تفتیش کی گئی، سنگین نوعیت کا ہر کیس اتفاقی تھا، ویکسین سے تعلق نہیں تھا۔ڈاکٹر فیصل سلطان نے کہا کہ کورونا کی برطانوی ویکسین آسٹرا زینیکا سے متعلق افواہیں بے بنیاد ہیں، آسٹرا زینیکا آسٹریلیا، فرانس ،جرمنی ،جنوبی کوریاسمیت کئی ملکوں میں لگائی جارہی ہے، اس ویکسین سے متعلق اطلاع گمراہ کن ہے، آسٹرا زینیکا ویکسین کے فوائد بہت زیادہ اور منفی اثر بہت تھوڑاہے۔