اسلام آباد(آن لائن) عالمی بینک نے احساس ایمرجنسی کیش پروگرام کا شمار عالمی سطح کے پہلے 4 بڑے سماجی تحفظ پروگراموں میں کرلیا، اس پر وزیر اعظم عمران خان کی طرف سے ردعمل سامنے آگیا۔ تفصیلات کے مطابق عالمی بینک نے عالمی سطح پر کوویڈ 19 سے نمٹنے کے لیے سماجی تحفظ پروگراموں پر مبنی رپورٹ جاری کردی، لیونگ پیپر کے نام جاری کردہ رپورٹ 18 شراکت داروں اور معاونین کی مدد سے تیار کی گئی ہے، یہ رپورٹ 650 صفحات پر مشتمل ہے اور اس میں بتایا گیا ہے کہ کس

طرح سے مختلف ممالک اور خطے وبائی مرض کے تناظر میں سماجی تحفظ کے اقدامات کی منصوبہ بندی اور ان پر عمل درآمد کررہے ہیں، پاکستان کا احساس ایمرجنسی کیش پروگرام ان میں سے ایک ہے۔اسی حوالے سے وزیر اعظم عمران خان نے سماجی رابطوں کی ویب سائٹ ٹوئٹر پر جاری کیے گئے اپنے ایک پیغام میں کہا ہے کہ معاون خصوصی سینیٹر ثانیہ نشتر اور احساس پروگرام کی پوری ٹیم کو یہ سنگِ میل بہت مبارک ہو کیوں کہ کہ وہ اس اعزاز اور عالمی پذیرائی کے پوری طرح حقدار تھے۔

موضوعات:احساس پروگرام