لاہور(اے این این)نواز شریف سے جاتی امراء میں قطری شہزادوں کی خصوصی ملاقات، قطری شہزادوں کا خصوصی وفد لاہور کے اولڈ ائیرپورٹ پہنچا جہاں سے انہیں سیدھا جاتی امراء لے جایا گیا۔ تفصیلات کے مطابق بیگم کلثوم نواز کی تدفین کے بعد سے سابق وزیراعظم نواز شریف سے تعزیت کیے جانے کا سلسلہ جاری ہے۔اس سلسلے میں کئی ممالک کے سفیروں نے سابق وزیراعظم نواز شریف سے جاتی امراء میں ملاقات کی اور بیگم کلثوم نواز کی رحلت پر گہرے
رنج و غم کا اظہار کیا۔اسی سلسلے میں شیخ الثانی بن حماد کی سربراہی میں قطری شہزادوں کا خصوصی وفد بھی لاہور پہنچا۔ قطری شاہی خاندان کے افراد خصوصی طیارے کے ذریعے لاہور کے اولڈ ائیرپورٹ پہنچے جہاں سے انہیں پھر سیدھا شریف خاندان کی رہائش گاہ جاتی امراء لے جایا گیا۔ جاتی امراء پہنچنے کے بعد قطری شہزادوں نے سابق وزیراعظم نواز شریف سے ملاقات کی اور بیگم کلثوم نواز کی رحلت پر تعزیت بھی کی۔ اس دوران دیگر کئی اہم امور بھی زیر غور آئے۔
