ممبئی (این این آئی)بولی وڈ شہنشاہ 75 سالہ امیتابھ بچن کو گزشتہ شب کمر اور گردن میں درد کی تکلیف کے باعث ہسپتال داخل کرایا گیا تھا، تاہم صحت میں بہتری پر اب انہیں ڈسچارج کردیا گیا۔امیتابھ بچن کی گزشتہ شب سوشل میڈیا پر سامنے آنے والی تصویر کے بعد ان کے مداح پریشان ہوگئے تھے۔لیک ہونے والی تصویر میں امیتابھ بچن اپنی کار کی پچھلی سیٹ پر موجود تھے، اور ان کے چہرے پر مفلر تھا۔

جس وجہ سے ان کا چہرہ صاف دکھائی نہیں دے رہا تھا۔تصویر سے اندازہ ہو رہا تھا کہ ان کی طبیعت بہت خراب ہیں، تاہم ان کے قریبی ذرائع کے مطابق وہ اپنے معمول کے چیک اپ کے لیے ہسپتال پہنچے تھے۔اداکار کے قریبی ذرائع کا کہنا تھا کہ وہ اپنے کمر اور گردن کے درد کے چیک اپ کے لیے ہسپتال پہنچے تو انہیں ایڈمٹ ہونے کا مشورہ دیا گیا۔تاہم ایک رات ہسپتال میں گزارنے کے بعد اب انہیں ڈسچارج کردیا گیا۔اداکار نے ناساز طبیعت پر نیک تمنائیں کرنے پر مداحوں کا شکریہ ادا کیا، اور انہیں اپنی طبیعت سے متعلق آگاہ کرنے کے لیے ٹوئیٹ کی۔امیتابھ بچن نے ٹوئیٹ میں ایک ہندی نظم بھی شیئر کی، جس میں انہوں نے اپنے اور ہسپتال کے تعلق سے متعلق لکھا۔انہوں نے نظم میں ہسپتال کو مندر سے تشبیح دی اور ڈاکٹرز کو اپنی زندگی کا لازمی جز قرار دیتے ہوئے لکھا کہ ’ہسپتال کا دورہ مندر کے دورے کی طرح ہی ہے۔این ڈی ٹی وی نے اپنی خبر میں بتایا کہ امیتابھ بچن کو ممبئی کی لیلاوتی ہسپتال میں داخل کرایا گیا تھا، جہاں سے وہ اپنا علاج کرواتے ہیں۔لیلاوتی ہسپتال کے چیف ایگزیکٹو آفیسر (سی ای او) روی شنکر نے بھی اس بات کی تصدیق کی کہ امیتابھ بچن معمول کے چیک اپ کے لیے آئے تھے، اور انہیں کمر اور گردن میں درد کی تکلیف تھی۔ہسپتال میں امیتابھ بچن کو درد کش انجکشن سمیت دیگر دوائیں دی گئیں، جس کے بعد طبیعت میں بہتری پر انہیں فارغ کردیا گیا۔ہسپتال سے فارغ ہوتے وقت ان کے ساتھ ان کے بیٹے ابھیشک بچن بھی تھے۔

موضوعات:امیتابھ بچن