ممبئی (این این آئی)بولی وڈ کوئین کنگنا رناوٹ ویسے تو گزشتہ 2 سال سے انڈسٹری کے مرد اداکاروں سے الجھنے کی وجہ سے خبروں میں رہی ہیں۔کنگنا رناوٹ نے گزشتہ ڈیڑھ سال کے دوران جہاں بولی وڈ فلم ساز کرن جوہر پر اقربا پروری جیسے الزامات لگائے، وہیں انہوں نے ساتھی اداکار ہریتھک روشن پر بھی بلیک میلنگ اور پیار کے جھوٹے وعدوں جیسے الزامات عائد کیے۔

ہریتھک روشن اور کنگنا رناوٹ کی جانب سے ایک دوسرے پر الزامات کا معاملہ تو یہاں تک جا پہنچا کہ دونوں نے ایک دوسرے کے خلاف مقدمات درج کرنے کی بھی کوشش کی۔تاہم اب کنگنا رناوٹ کے رویے میں تبدیلی دیکھی جا رہی ہے، اور انہوں نے ان ہی مرد اداکاروں کے حوالے سے اپنے بیانات نرم انداز میں دینے کا سلسلہ شروع کردیا ہے، جن پر چند ماہ قبل تک وہ الزامات عائد کرتی نظر آتی تھیں۔حال ہی میں کنگنا رناوٹ اسٹار ورلڈ پر نشر ہونے والے ریئلٹی شو ’انڈیا نیکسٹ سپر اسٹارز‘ میں شامل ہوئیں، جس میں کرن جوہراور روہت شیٹی بھی شامل ہوئے۔جہاں اس پروگرام میں کنگنا رناوٹ اور کرن جوہر میں دوستی ہوئی، وہیں اداکارہ نے پہلی بار اپنی محبت اور شادی سے متعلق پوچھے جانے والے سوالات پر بھی کھل کر بات کی۔ڈی این اے انڈیا کے مطابق پروگرام کے سیٹ پر کنگنا رناوٹ نے سوالات کے جوابات دیتے ہوئے اپنی محبت اور شادی سے متعلق خاموشی توڑتے ہوئے واضح کیا کہ وہ فوری طور پر شادی نہیں کرنے والی۔کنگنا رناوٹ نے واضح کیا کہ وہ ابھی 30 سال کی بھی نہیں ہوئیں، اور نہ ہی وہ فوری طور پر شادی کرنے والی ہیں۔اداکارہ نے اس بات پر افسوس کا اظہار کیا کہ نہ جانے کیوں لوگ چاہتے ہیں کہ خواتین 30 سال کی ہوتے ہی شادی رچالیں۔خیال رہے کہ ماضی میں اداکارہ یہ کہ چکی ہیں کہ ہریتھک روشن ان سے دل و جان سے محبت کرتے تھے،

اوراداکار نے ان سے شادی کرنے کا وعدہ بھی کیا، تاہم بعد ازاں وہ مکر گئے۔تاہم ہریتھک روشن نے ان الزامات کو مسترد کرتے ہوئے کہا تھا کہ انہوں نے صرف کنگنا رناوٹ کے ساتھ بطور ساتھی اداکار کے فلموں میں کام کیا۔